TURA: South West Garo Hills a·jani Garobadha OGC ning·o donggipa Tiksali songo, Bangladesh aro Assam a·dokni manderang, niam gri re·napbaenba songdong a·chatokenga ine A·chik State People’s Front (ASPF) Garobadha regional unit, police-rangna badi ka·doangaha.
Ia Tiksali songara, Assam-ni sima ari sepango donggipa song ong·achim.
ASPF-ni police-rangna FIR-o janapatani gitade, ia biapona Bangladesh aro Assam a·dokni manderang, niam gri re·napbaenba songdong a·chatokengani a·selan ia jolrango songdongenggipa manderangna kenchakna nanganirang ong·enga aro ong·gija dakanirangba batroroenga.
“Ia songona niam gri re·napbae songdong a·chaenggipa manderang, jolo songdongkamgipa manderangoniko matchu matte, do·o aro uandakgipa ma·manti bosturangko cha·uenga aro ian jolo songdongenggipa manderangna kenchakna nanganiba ong·enga. Uni gimin ia biapona niam gri re·napbae songdongenggipa manderangni gimin am·sandienba, ia manderangni kosako nanga gita ja·kurangko de·china didienga,” ine Police-rangna sedoatgipa FIR-o ASPF Garobadha regional unit parakataha.
