SGH-ni sub-centre-ko bilsi 17-na galchipe donani gimin inquiry dakchina dabia

TURA: South Garo Hills a·jani Silkigre PHC-ni ning·o donggipa Rongchonggre sub-centre ba Health & Wellness Centre-ko bilsi 17-na jakkalgija galchipe donahani gimin inquiry dakchina Garo Enlightenment Society (GES), a·dokni Health Minister Ampareen Lyngdoh-ko didiataha.
GES-ni president Clinton R Marak-ni Health Minister-na sedoatgipa chittio parakatani gitade, re·anggipa February 11 tariko ua an·tangan Rongchonggre songona re·ange, ia sub-centre-ko nieon, ia sub-centre-ko 2008 bilsion rika matchotahachim indiba batanggimin bilsi 17-ni gisepo ia sub-centre-ko kulie on·chipjaha ine songni manderang, una aganataha.
“Ia jolrango donggipa dam 30 songrangna baten ia Rongchonggre sub-centre-o pangchaktokpaengachim indiba indita bilsirangna ia sub-centre-ko kuligija donchipahani a·sel songni manderang, sanna bananirangko ra·anio bang·en neng·nikanirangko chagrongna nangtokenga. Iani bidingo songni manderang, baditaba chang dilgiparangna seanirangchi aro grongeba u·iatahachim indiba da·alonan iani bidingo maming ja·kurangko de·chipkujaenga,” ine Marak parakataha.
Ia gital sub-centre-ko jakkalgija galchipahani a·selan Rongchong sub-centre-o kam ka·enggiparang da·o nosto ong·gimin community hall aro skul nokosa kamrangko ka·chakna nangenga aro ia hall-o samrangko dona, palangrangko dona aro kam ka·enggiparangnaba dongchakanirangan dongjae neng·nikanirangko chagrongna nangtokenga. Ia sub-centre-o kam ka·enggipa manderang iandake neng·nikanirangko chagrongna nangengani a·selan songo noko donggipa manderangna sanna bananirangko on·anio neng·nikanirangko man·tokna nangenga ineba GES-ni president parakataha.
Ia gital rikgipa sub-centre-ko bilsi 17-na galchipe donahani gimin ta·raken inquiry-ko dakchina Health Minister-ko didiatengon, Rongchonggre songni manderangnaba uamangni bilo pangchake, an·seng baljoke janggi tangna cholko on·china GES-ni president mol·molataha.