TURA: Chatro chatrirang bang·batan cholgrigipa nokdangrangonisa ong·e scholarship-rangko somoi gita man·jaengani a·sel neng·nikanirangko chagrongna nangtokenga ine Tura-ni MDC aro BJP-ni state vice president Bernard N Marak parakatenba, chatro chatrirangna scholarship-rangko somoi gita on·china a·dok sorkariko didiataha.
Chatro chatrirangni scholarship-rangko a·dok sorkarini on·ninggija donganiara Scheduled Tribe (ST) chatro chatrirangni man·gni bilrangko jegalani gita ong·enga ineba Marak parakataha.
Marak-ni parakatani gitade, scholarship-rangko on·ningjaengani gimin ua Tribal Ministry-oniko am·sandiaton, a·dok sorkarioni watatgipa chatro chatrirangna somoi gita tangka paisarangko watatengachim ine una u·iataha.
“Indake ong·genchimoba, a·dok sorkarini 10 percent bakko on·atgijade ma·mong sorkarini 90 percent bakko on·atna man·jawa,” ine Marak parakataha.
Scholarship man·na nangenggipa chatro chatrirangni bimingrangko aro 10 percent bakko a·dok sorkari watatningjaengani a·selan jajaani aro chatro chatrirangna scholarship-rangko on·anio ja·manchakna nangenga ineba Tura MDC parakataha.
“Jaantian chatro chatrirangni mobile recharge-rangoniko a·dok sorkari 4% Cess tax kattienga aro chatro chatri sakprakan japrako komibeoba gong 300-ni mobile recharge ka·engani gimin ian krorni kror ong·pilengachim indide maikai a·dok sorkari, 10 percent bakko on·na man·jaenga. Ian dal·begipa sing·ani ong·enga,” ine Marak parakataha.
“Chatro chatrirang bang·batan kangal cholgri nokdangrangonisa ong·ani gimin ST chatro chatrirangni neng·nikanirangko niatchina anga a·dokni Chief Minister aro Education Minister-ko mol·molenga. Lekka poranian mongsonggipa daito ine election-o ku·rachakgimin kattarang kakket ong·bebegenchimode, chatro chatrirangni neng·nikanirangko ta·raken niatna nangchongmota,” ine Tura MDC parakataha.