TURA: Tura-ko Winter Capital/Second Capital songchina dabienggipani bidingo songni nokni dilgiparangna aro manderangna agan-talatanirangko on·na gita re·anggipa Sonibar salo A·chik State People’s Front (ASPF), Garoland State Movement Committee (GSMC) baksa nangrime awareness campaign-ko North Garo Hills a·jani Chisim A·pal songo ong·atangaha.
Ia awareness campaign-ko ong·atanio ASPF-ni general secretary Bernita R Marak, jinmana aganprakangengon, Tura-ko Winter Capital songchina dabianiara gital dabiani ong·ja indiba Meghalaya a·dokko man·e on·dilanggipa pagitchamrangni songgigrikanian ong·a ine parakataha.
“Tura-ko Winter Capital songna gita a·dokko man·e on·dilanggipa gitcham dilgiparangan songgrikahachim indiba rasong gribee ia songgigrikaniko da·alona chu·sokatchipkujaenga. Iani bidingo chinga, baditaba chang a·dok sorkarina seachi u·iataha aro adita salrangna skangba chinga, GSMC baksa iani bidingo a·dokni Chief Minister aro gipin dilgiparangna sedoattaiaha,” ine Marak aganaha.
Tura-ko Winter Capital songahaode a·dokni gipin biaprango gitan Garo Hills-oba namroro silroroaniko nikna man·gnokchim ineba ua aganaha.
“Meghalaya a·dokni skotong Shillong songjinmaona re·ruraanio bang·en koros aro somoirang bon·na nangengani gimin Garo Hills-ni manderang neng·nikanirangko chagrongna nangtokenga. Uni giminsa Tura-ko Winter Capital ba Second Capital songchina chinga dabienga,” ine ASPF-ni general secretary aganaha.
Ia apsan dakgipa awareness campaign-ko Garo Hills-ni pilak biaprangon ong·atna gitaba ia tom·anio jinma tik ka·e donangaha.
“Ia awareness program-ko ong·ataniara sorkarini kosako chakataniko mesokna ong·atenga ong·ja indiba Tura-ko Winter Capital songna gita Meghalaya a·dokni skanggipa Chief Minister Capt Williamson A Sangma aro gipin dilgiparangni gisepo songgrikani dongani giminsa iani bidingo Garo Hills-ni manderangna ma·siate on·na ia program-ko ong·atenga,” ine Marak aganaha.
Tura-ko Winter Capital songani bidingo awareness campaign-ko ong·ata
Date:
Share post: