TURA: An·tangko doctor ine tol·enba manderangoniko cha·boke ra·na jotton ka·gipa mandeko ta·raken rim·china gita Bristibar salo, South Garo Hills a·jani social activist Greneth M Sangma, police-rangko didiataha.
An·tangko Ampati Civil Hospital-ni doctor ine tol·enba, Garo Hills-ni dingtang dingtang health centre-rango kamrangko on·gen ine manderangoniko tangka dabie ra·engani gimin saksa Hirak Sangma minggipa mandeni kosako Greneth, FIR ka·ahachim.
Ia mandeni kosako FIR ka·ani ja·mansa, ia mandeara doctor-ba ong·ja aro Ampati Civil Hospital-o maming bak dongja ine ma·sina man·aha.
Greneth Sangma-ni FIR-o janapatani gitade, ia mande, Chokpot CHC-o kam on·gen ine me·chik saksaoniko tangka dabiaha aro dingtang dingtang hospital-rango kamrang donga ine an·tangni Whatsapp status-oba done, manderangko cha·bokna jotton ka·ahachim.
Indake ong·engon, ia mandeni bidingo talbate am·sandianirangko dakon, ia mandeara North Garo Hills a·jani Kharkutta police station-ni ning·o donggipa Badaka songni Benjamin G Momin minggipa mandesa ong·a ine ma·sina man·aha ine Greneth parakatenba, ia mandeko uni manderangoniko cha·boke ra·na jotton ka·ahani gimin ta·raken rim·china police-rangko didiataha.
“Chingni am·sandie man·ani gitade, ia mandeara batanggimin somoirangonin an·tangko doctor ine tol·enba, manderangna kamrangko on·gen ine bang·en tangka paisarangko dabie ra·aha. Ramram manderangko cha·bokna gita ua tol·gipa identity card-rangkoba jakkalaha,” ine Greneth, uni gnigipa FIR-ko ka·anio parakataha.
Ia mandeni bank account-ko ta·raken champengatchina aro mandeko sandie rim·china gitaba ua police-rangko didiataha.