AMPATI: An·tangko doctor ine tol·enba manderangoniko cha·boke ra·na jotton ka·gipa mandeni kosako social activist Greneth M Sangma-ni FIR ka·gipara Ampati Police Station-o ong·ja indiba Baghmara Police Station-osachim ine Bristibar salo, South West Garo Hills a·jani Superintendent of Police (SP) Vikash Kumar, talataniko on·angaha.
Ia obostani bidingo FIR-ko Ampati Police Station-o ka·aha ine dingtang dingtang songbadrango seahani gimin South West Garo Hills a·jani SP, iani bidingo talataniko on·angaha.
An·tangko Ampati Civil Hospital-ni doctor ine tol·enba, Garo Hills-ni dingtang dingtang health centre-rango kamrangko on·gen ine manderangoniko tangka dabie ra·engani gimin saksa Hirak Sangma minggipa mandeni kosako Greneth, FIR ka·ahachim.
Ia mandeni bidingo talbate am·sandianirangko dakon, ia mandeara North Garo Hills a·jani Kharkutta police station-ni ning·o donggipa Badaka songni Benjamin G Momin minggipa mandesa ong·a ine ma·sina man·aha ine Greneth parakatenba, ia mandeko uni manderangoniko cha·boke ra·na jotton ka·ahani gimin ta·raken rim·china police-rangko didiataha.
Indake ong·genchimoba, ia obostani bidingo FIR-ko Ampati police station-o ka·aha ine songbadrango seaniko South West Garo Hills a·jani SP jegalatskaaha aro koborrangko name talchenggija skatang sejachina gitaba didiataha.
An·tangko doctor ine tol·enba manderangko cha·bokna jotton ka·gipa mandeni bidingo police-rang am·sandina a·bachengataha aro sandie man·ani kri nanga gita ja·kurangko de·anggen ineba South West Garo Hills a·jani SP parakataha.
 |
ReplyForward
|