SHILLONG: Sukrobar salo, Meghalaya Legislative Assembly-ni Budget Session-ko a·bachengatanio, a·gilsakko wate re·anggipa gitcham dilgiparangna Assembly-ni membor-rang, gisik ra·e mande ra·pilskaaniko dakangaha.
Ia session-o Assembly-ni Speaker Thomas A Sangma, a·songni gitcham Prime Minister Dr Manmohan Singh-ko gisik ra·atpilengon, uni Prime Minister ong·e a·songna dangdike on·anikosan ong·aigija unbaksa apsan kam ka·rime nikanirangkoba ua janapangaha.
PM Manmohan Singh-na agreba Manipur a·dokni gitcham minister N Kayasi aro Karnakata a·dokni gitcham Chief Minister SM Krishna-koba Assembly Speaker gisik ra·e, uamangni kamrangni gimin janapangaha.
A·dokni Chief Minister Conrad K Sangma-ba a·songni gitcham Prime Minister Manmohan Singh-ko gisik ra·e mande ra·pilskaaniko on·angengon, uni a·songna aro dingtang dingtang kamrango dangdike on·anirangko ua janapangaha.
Manipur a·dokni gitcham minister N Kayasii-ni gimin janapatskaengon, ua saksa an·tangko bamatgipa aro onbatsranggipa gadangni manderang baksa bakrimna sapgipa mande ong·achim ine a·dokni Chief Minister, gisik ra·atpilaniko dakangaha.
A·dokni gitcham minister aro KHADC-ni gitcham MDC DP Iangju aro North Tura-ni gitcham MLA Noverfield R Marak-koba a·dokni Chief Minister gisik ra·e, uamangni janggi tangani aro kamrangni bidingo janapangaha.
Ia tom·anio, Opposition dolni dilgipa Mukul Sangma-ba a·songni gitcham Prime Minister Dr Manmohan Singh-na mande ra·pilskaaniko dakangaha aro uni janggi tangani baksana kamrangkoba janapangaha.
North Tura-ni gitcham MLA Noverfield R Marak-koba Opposition dolni dilgipa gisik ra·e, uni janggi tangani aro kamrangni bidingo mittelpile aganangaha.