SHILLONG: Meghalaya a·doko sorkariko chalaidilenggipa party ong·genchimoba Khasi Hills Autonomous District Council (KHADC) election-o chu·sokgipa ong·na man·jahani gimin Opposition dolni dilgipa Mukul Sangma, National People’s Party (NPP)-ko chonnikatenba, ia election-o maini a·sel chu·sokna man·jaha, uko nipiltaichina aro manderang baksa bakrimpilchina Meghalaya Democratic Alliance (MDA)-o bak ong·enggipa political party-rangko didiataha.
Election-o Congress aro uandakgipa bilakgipa dolrangba seat-rangko chena man·jae a·doko politics-ni dingtanganiko mesokengaha ine janapatengon, a·doko sorkariko chalaidilenggipa dol ong·genchimoba aro bilo ong·enggiparangko matnangronggenchimoba da·o election-o amako man·skaengaha ine Sangma, NPP-ko chonnike aganaha.
“Ia election-ni result-rangan sorkario ong·enggipa political dolni dilgiparangna mikrakatani ong·china aro uamangni manderangna aro chadamberangna dangdike on·anio chu·sokgijaniko gisik ra·atchina,” ine Sangma aganaha.
Kamrangko man·jae neng·nikanirangko man·tokengani giminan bang·bata chadamberangan Voice of the People’s Party (VPP)-na pu·ontokaha ine janapatengon, dingtang dingtang sorkari department-rango bangbang ong·e dongenggipa kamrangkoba gapatna gisiko nangjaenga ine Opposition dolni dilgipa, a·dok sorkariko matnangataha.
Adita salrangna skang State Security Commission-ni tom·anio, Police department-ni kamrango ra·aniko March jani gisepon matchotgnok ine ku·rachakgipani bidingo janapatskaengon, March jade da·o a·bachengpilengaha indiba gital kamrangkode da·onan nakatatkujaenga ine Sangma matnangataha.
A·dok sorkarini dingtang dingtang department-rango grorang bang·dugaengahani giminba ua a·dok sorkariko matnange aganaha.