Rajabala skulni a·ako ra·seka ine GHADC aro mande sakgnini kosako FIR ka·a

TURA: West Garo Hills a·jao donggipa Rajabala Higher Secondary School-ni a·ako ra·sekna jotton ka·a ine matnangenba, School Managing Committee (SMC)-ni secretary Hadisul Islam, Garo Hills Autonomous District Council (GHADC)-ni Land & Revenue department baksana Rajabala jolo donggipa Kalogaon songni Nokma Milson M Sangma aro Rajabala police station-ni ning·o donggipa Sakmal songni Firoz S Sangma minggipa manderangni kosako West Garo Hills a·jani Superintendent of Police (SP)-na FIR ka·doangaha.
Islam-ni FIR-o parakatani gitade, ia a·ara Mouza-VI 3lot-ni ning·o Bigha 28 Kata 3 Lesa 2 ong·e Rajabala-o donggipa Rajabala HS School-ni a·a ong·achim aro ia a·arangoni Bigha 22 Kata 0 Lesa 2-kode ia skulni bimingon patta dake, bangki bigha 6 kata 3 lesa 0-kode patta dakkugija skulni kal·chakram dake jakkalengachim.
Indake ong·engon, re·anggipa February-ni 26 tariko GHADC-ni ning·o donggipa Land & Revenue department-ni official-rang, FIR-o janapgipa sakgni manderang baksa skulni SMC-na u·iatgija aro uamangni dongpaani gri, ia a·ako ‘Khas Land’ ine todraeaha ine SMC-ni secretary, FIR-o parakataha.
Ia official-rang, skulni simao kagipa krongrangkoba ra·galaha aro skulni kal·chakramo songgipa krongrangkoba pe·e galangaha ine Islam, FIR-o parakataha.
“Ia a·ako 1952 bilsio chingni pagitchamrangsa Rajabala HS School-ko kulina gita chingna on·angaha aro untalan ia biapo ia skulko chalaipaenga. Ia skulara Meghalaya a·doko sorkarini dakchakanichi chalaienggipa skulrangoni mingnambatgipa skulrangoni damsa ong·paachim,” ine SMC-ni secretary parakataha.
Ia Rajabala HS School-ara, Mouza-VI 3lot-ni ning·o ong·e Garo Hills District-ni Non-Scheduled area-o ga·akgipa biaprangsa ong·ani gimin ian GHADC-ni ning·o ga·akgipa biaprang ong·ja ineba SMC-ni secretary parakataha.
Indake ong·engon, Rajabala HS School-na maming u·iatani gri ia skulni a·arangko ra·sekna jotton ka·ahani gimin aro simao songgipa krongrangko pe·e galahani gimin GHADC-ni ning·o donggipa Land & Revenue official-rang aro FIR-o janapgipa mande sakgnini kosako rakgipa ja·kurangko de·china SMC-ni secretary, West Garo Hills a·jani SP-ko didiataha.