SHILLONG: Meghalaya 2021 aro 2024 bilsirangni gisepo Maternal Mortality Rate (MMR) 50%-mangni gita komie manderangni an·seng-bajole donganio chu·sokgipa ong·aha indake a·dokni ‘Rescue Mission’-ko mittelna kraa.
2020-2021-o, Meghalaya-ni MMR sak 100,000 bi·sa an·pakgipaprako 243 ong·achim. Ianoni 2022-2023-o 155-ona tang·onaha aro 2024 January-ona 107-ona tang·ondapaha.
‘Rescue Mission’-ko December 2020-o ma·giparangni bi·sa an·pakmitingo be·eno neng·nikaniko man·anirangko namatna, bi·sa an·pakmitingo ma·giparangni sianirangko komiatna kam ka·na ua mission-ko a·bachengataha. A·doko, district-o, hospital aro manderangni gadangrango manderangni kam ka·anichi be·en-bimang an·seng-baljoke donganina kam ka·e on·aniko ua mission-chi nambatatenga aro uko nangnikani batroroenga ine aganaha.
Ia misison-ni ning·o mongsonggipa ja·ku de·anirang kam ka·aniko aro chanchianiko bariatna bang·a administration gadangrango chotchanggija nipiltaiani meeting-rangko ka·enga. Hospital-o bi·sarangko ba·aniko, bi·sa an·pakna skang somai gita hospital-ona sokbaatna aro bi·sako an·pakmano namedake simsakaniko batatna aro bi·sa an·pakmitingo ma·gipa siako komiatna songsalo kam ka·e on·ani bakrangko chu·sokatna nisan done ja·ku de·anirang ong·a.
2021 aro 2024 bilsirangni gisepo bilsi bongani ning·o bi·sa sia a·doko 34% komiako serikaha.
Ia a·samsoanirang ong·genchimoba neng·nikanirang dongkuenga. Meghalaya Health Policy-ni gita, chadambe me·tra bi·sarangni gisepo an·o donganirang 17%, me·chikrangni an·chi komie namjabegipa obosta ong·ani 59%, noko ba hospital-ona ra·bamitingo ramao bi·sako an·pakani 49% aro ma·giparangni bi·sa ba·ani sak bonga ba una bate an·o dongani 40% ong·enga.
