TURA: Meghalaya Pradesh Service Commission (MPSC)-ko namdapatna aro taridapna gita a·doko songdongenggipa manderangni aro dingtang dingtang dolrangni agan-ku·pattianirangko ra·na gita MPSC-ni State Level Committee-ko songe donahani gimin Garo Hills-ni dingtang dingtang dolrang, chong·motan Tura Garo Senior Citizens’ Forum (TGSCF), Garo Reservation Policy Co-ordination Committee (GRPCC), New Tura Development Forum (NTDF), Ku·mandi Ko·tok (KRK), Garoland State Movement Committee (GSMC), A·chik Consciousness Holistically Integragated Krima (ACHIK) aro gipin dolrangba apsan chanchirimenba, MPSC-ko taridapani bidingo agan-ku·pattianirangko on·na tik ka·angaha.
Iani bidingo, State Level Committee-ni Member Secretary Ambrose Ch Marak-na sedoatengon, dingtang dingtang kamna manderangko ra·anio Garo aro Khasi-Jaintia-rangni gisepo apsan ong·jaengani gimin MPSC-ko namdapatchina aro taridapaniko nangnikenga ine NTDF-ni general secretary LC Momin parakataha.
“State Reservation Policy-o Garorangna 40 percent aro Khasi-Jaintia-rangna 40 percent-ko a·dokni pagitchamrangan kange donangahaoba dingtang dingtang kamna ra·anio ia niamko chu·sokatjaenga ine chinga nikna man·enga. Uni gimin ia niamko gisik aro bebeo ja·rikna man·na gita MPSC-o namdapataniko chinga nangnikenga,” ine A·chik NGO-rangni pal, NTDF-ni general secretary parakataha.
MPSC-ko taridapani bidingo ku·pattianiko on·angskaengon, MPSC-ni membor-rangko seokanio Garo aro Khasi-Jaintia jatrangoniko apsan daken seokchina A·chik NGO-rang didiataha.
MPSC-ni gita kamna ra·anio Garorangna 40% aro Khasi-Jaintiarangna 40%-ko ja·rikenga ong·ode ia niamkon kakket aro bebeo ja·rikchina gita A·chik NGO-rang didiataha.
MPSC-ni vice chairman/chairperson aro joint secretary-ko seokchina aro MPSC-ni kamrangko nambate ka·na man·na gita uamangni office-rangko Tura-oba kulichina gita A·chik NGO-rang didiataha.
Tura-ni MPSC cell-ko ta·raken kulie chu·gimik bil gnangate chalaichinaba A·chik NGO-rang didiataha.
