TURA: All Garo Hills Trained Electricians Association (AGHTEA)-ni chang 13-gipa annual conference ba bilsini tom·bimonganiko re·anggipa Sonibar salo, Tura-ni Govt Girls Higher Secondary School-o ong·atangaha aro ia tom·bimonganiona association-ni dingtang dingtang unit-rangko dilenggipa manderang, re·bae bak ra·angtokaha.
Ia tom·aniko ong·atani bidingo AGHTEA-ni president Justine T Sangma, jinmana talate on·angengon, Garo Hills-ona gipin biaprangoni electrician-rang re·bae, maming licence gri company-rangni bimingo dingtang dingtang songrangona BPL line post-rangko songe on·enga aro iandake niam gri kam ka·aniko AGHTEA-ni gita champengsona jinma chanchirimna ia tom·aniko ong·ataha ine parakataha.
Bijolini kamko ka·enggipa mitam contractor-rang, Garo Hills-ni electrician-rangko jakkalgija gipin biaprangonikosa rimbae kamrangko ka·atengani giminba AGHTEA suk ong·gijaniko parakangaha aro iandake gipin biaprangoni electrician-rangko champengsona gitaba tik ka·angaha.
Nokrango, office-rango ba badiaba company-rango wiring ka·na nangengon, joltango skie ra·gimin electrician-rangkosa jakkalchina aro electrician-rangko kam ka·atengon, pangnan uamango licence aro identity card-rang dongama dongja uko sandichina gita AGHTEA-ni president Justine Sangma didiataha.
AGHTEA-ni gitcham dilgiparangna dongimin term ba somoirang bon·ahani gimin ia tom·bimonganio dingtangmancha AGHTEA-ni gital dilgiparangkoba seokangjolaha aro seoka man·gipa manderangara, president-na Justine T Sangma, vice president-na Sengsrang R Marak, secretary-na Pillingstone T Sangma, joint secretary-na Mikkanel R Marak, accountant-na Krinder R Marak, treasurer-na Marjine T Sangma, finance secretary-na Sengrak R Marak aro adviser-na Manseng A Sangma ong·a.
