TURA: India a·songni salgro salaram jolo donggipa Tibeto-Burman Linguistics Association-ni chang 5-gipa International Conference-ko re·anggipa February 27 tarikoni March 1 tarikona, NEHU Tura Campus-ni Garo Department, Mysuru-ni Central Institute of Indian Languages (CIIL) aro NEHU Shillong-ni Indian Council of Social Science Research (ICSSR) baksana nangrime NEHU Tura Campus-o ong·atangaha.
Ia international conference-ona India a·songonisan ong·aigija gipin a·songrangoniba skia man·gipa manderang, dingtang dingtang ku·sikrangni bidingo research-ko dakenggipa manderang aro gipinrangba re·bae bak ra·angtokaha.
Ia conference-ko a·bachengatanio, Garo Department, NEHU Tura campus-ni Head, Dr Jacqueline R Marak rimchaksoani kattarangko aganangaha aro ia program-o Tibeto-Burman Linguistics Association-ni secretary aro Silchar-o donggipa Assam University-ni Assistant Professor Dr Monali Longmailai, association-ni miksongani aro niksamsoanirangko jinmana agan-talate on·angaha.
Ia program-ko ong·atanio C-NELD, CIIL Mysuru-ni official aro association-ni Committee Membor Dr Aleendra Brahma-ba saksa mongsonggipa sokgipa ong·e jinmana aganprakangaha.
Ia tom·anio, NEHU Tura Campus-ni Director Prof Sujata Gurudev-ba jinmana aganprakengon, iandakgipa conference ba tom·bimonganirangko ong·atani gamchataniko jinmana agan-talate on·angskaaha.
Ia salgittamna ong·atanggipa International Conference-o dingtang dingtang katta bichongni gimin agan-talate on·anggipa gipin manderangara, Lucknow University-o donggipa Linguistics Department-ni Prof Kavita Rastogi, Tezpur University-o donggipa Linguistics Department-ni Prof Madhumita Barbora aro gipinrang ong·a.
