SHILLONG: Assam aro Meghalaya a·dokni simarango tom·tomaniko ra·bana gita je bangki dongkuenggipa damdok biaprangoba a·dok sorkari, namgrikaniko ra·bana raken kamko ka·enga ine Mongolbar salo, a·dokni Chief Minister Conrad K Sangma, Assembly-o parakataha.
Assembly-ni Budget Session-o Nongpoh-ni MLA Mayralborn Syiem-ni chanchirimna ra·bagipani bidingo sing·anirangna Chief Minister, iako aganaha.
“Sima jolrango pangkamgipa tom·tomaniko ra·bana chinga kamrangko ka·enga. Da·alo chinga Memorandum of Understanding (MoU)-o soi ka·grikaha aro a·dok damgnini simarango golmal ong·enggipa damdok biaprango namgrikaniko ra·bana cholko sandigen,” ine Sangma aganaha.
Assam aro Meghalaya a·dokni simarango batanggimin bilsi 50 batpilen golmalrangko namatna man·jaengoba darang sorkarirangan iani bidingo chanchirimdilna gita sikjaha indiba da·alo MDA sorkari, ia neng·nikaniko namatna gita ja·kuko de·dilaha ineba Sangma a·kangataha.
Golmal ong·enggipa damdok biaprangoni Tarabari jolrangkode manderangni nangnikanio pangchake sorkari namatna man·aha ine janapatengon, ia jolrango je biaprangan Meghalaya-ona re·baaha ia biaprangkode Assam sorkari wate katpilaha ine Chief Minister parakataha.
Ia biaprango songdongenggipa manderangna rama jal·langrang aro manderangni dingtang dingtang nanganirangko chu·sokate on·na sorkari kamko ka·gen ineba Sangma ku·rachakaniko on·angaha.
Sima jolrango Assam sorkari, sipai dolrangchi sinjetaniko on·enga ine matnangenggipani bidingo janapatskaengon, ian namen rakbegipa obostao ong·enga ine Chief Minister aganaha.
“Batanggimin bilsi 53-na ia jolrango so·sojengjeng ong·anirangko an·ching nikna man·engaha. Indiba chinga ia neng·nikanirangko namatna gita kang·kare kae kam ka·enga aro iandakgipa kamko batanggimin somoirango nikna man·kujachim,” ine Sangma aganaha.
“Ian namen rakbegipa kam ong·a indiba agangrikanichisa an·ching cholrangko man·a,” ineba ua aganaha.
Sima jolrango donggipa constituency-rango maiba a·selrang ong·na nanggenchimode aro border police outpost-rangko rikanirang matchotningjaenga ong·ode una u·iatchina gitaba Chief Minister, sima jolni MLA-rangko didiangaha.
“Na·simang (MLA-rang) angna joljolan phone ka·e u·iatna man·aigen. Na·simangni constituency-rango maiba a·selrang ong·na nanggenchimode sima jolrango songdongenggipa manderangko chel·chakna angan skanggipa ong·gen,” ine Sangma ku·rachakaniko on·angaha.