TURA: Bangladesh aro gipin biaprangoni Meghalaya a·dokona niam gri napsrukanirang batroroengani gimin niam gri napsrukaniko champengna gita 2016 bilsini Meghalaya Residents Safety & Security (MRSSA)-ko nambate jakkalchina Constitutional Rights Forum (CRF) Raksamgre regional unit, a·dokni Chief Minister Conrad K Sangma-ko didiataha.
CRF Raksamgre regional unit-ni Chief Minister-na sedoatani gitade, ia sal somoirango Bangladesh a·songoni Meghalaya a·dokona niam gri napsrukanirang batroroengani gimin ian a·dokni manderangna, mongsongbate Garo Hills-ni manderangna jajrengna nangani ong·engachim.
Niam gri napsrukanirang batroroengani a·selan Meghalaya a·doko aro Lower Assam-ni sima jolo donggipa mitam constituency-rango manderangni rang·san jelbra jelsuaniko nikna man·enga ine janapatengon, niam gri napsrukbagipa manderangko am·sandienba biaptangtangona watatpilna man·na gita Meghalaya a·dokoba National Register of Citizens (NRC)-ko ra·gatchina CRF Raksamgre regional unit, Chief Minister-ko didiataha.
Meghalaya aro Assam a·dok damgnion pu·onenggipa manderangko champengna man·na gita 44-Raksamgre, 45-Tikrikilla, 46-Phulbari, 47-Rajabala, 48-Selsela, 53-Ampati 54-Mahendraganj aro Garo Hills-ni a·kawe jolrango donggipa constituency-rango pu·onenggipa manderangko name am·sandichina gitaba CRF Raksamgre unit didiataha.
Meghalaya a·doko manderangni re·ruraanirangko nambate nirok sandina man·na gita MRSSA 2016-ko nambate jakkalchinaba CRF Raksamgre regional unit, a·dokni Chief Minister-ko didiataha.