Tura-o Architecture & Urban Planning College-ko bakan kulignok: Edu Minister

SHILLONG: Tura-o Architecture & Urban Planning College-ko kulina nokrangko rika matchotaha aro All India Council for Technical Education (AICTE)-ni permission-ko man·ahaode ia college-ni academic session-ko a·bachengatgnok ine Budbar salo, a·dokni Education Minister Rakkam A Sangma, Assembly-o parakataha.
“Dingtang dingtang ra·bianirangko chagrongna nanggenchimoba nokrangkode rikmanaha aro da·o chinga ia college-ni academic session-ko a·bachengna gita AICTE-ni permission-nasa senge dongenga,” ine Education Minister, Assembly-ni Question Hour-o sing·anirangna aganchakaniko on·angaha.
AICTE-ni permission-na ia bilsini December jao sorkari, dorgastoko galattaigen ine janapatengon, ia somoirangosan website-ko kuliaiani gimin uamang December jaosa dorgastoko galna man·gen ine Sangma aganaha.
Ia project-na baksku baksa dake gimik gong kror 26 tangkarangko India sorkari sanction ka·aha aro da·alona kingking gong kror 23.4 tangkarangko India sorkari watatmanaha ineba Education Minister aganaha.
Ia college-ni academic session-ko a·bachengatanio ja·manchakenganina Opposition dolni dilgipa Mukul Sangma, an·tangni suk ong·gijaniko parakatengon, “Ian 90:10-o pangchake tangka paisarangko chame on·gipa project ong·a aro an·ching ma·mong sorkarini sanction ka·kugniko champenga gita ong·enga. An·ching indakgipa college-ko Tura-osan kulie dongaina man·jawa maina a·dokni pilak biaprangon hajalni hajal chatro chatrirang iandakgipa course-rangko ra·na senge dongtokenga,” ine aganaha.
Ja·manchakani a·selrangko name talatgija Education Minister, a·selrangko dongnuna jotton ka·enga ine Mukul Sangma-ni matnanganina a·dokni Chief Minister Conrad K Sangma aganchakaniko on·angskaengon, iani bidingo a·selrangko minister dongnuna miksonganirang dongja ine talataniko on·angaha.
COVID sajinma aro ramarang dongjani a·selsa ia project-ko matchotanio ja·manchakna nangaha ineba Chief Minister talataniko on·angaha.
“Indiba da·o kamrang matchotahani gimin chinga kusi ong·a aro bakan chinga academic session-ko a·bachengna man·gnok,” ine Chief Minister ku·rachakaniko on·angaha.