SHILLONG: Ia 2025-2026 bilsina 2.96 percent ong·gipa Gross State Domestic Product (GSDP)-ni gong kror 1970 ong·gipa deficit budget-ko Budbar salo, a·dokni Chief Minister Conrad K Sangma, Assembly-ni budget session-o parakataha.
Ia 2025-26 bilsini budget-o gong kror 5421-ni climate budget aro gong kror 6219-ni gender budget-koba Chief Minister parakataha.
Ia bilsini budget-ko Assembly-na mesoke on·angengon, ia bilsini budget-o chu·gimik receipt-rangara gong kror 30,415 ong·enga aro ianoni gong kror 25,591-de revenue receipt aro gong kror 4824-de capital receipt ong·enga ine Chief Minister parakataha.
Gro donggipa gong kror 4,788-ko changale total receipt-ko gong kror 25,627-na hisapaha ine janapatengon, total expenditure-na gong kror 30,003-ko hisapenga aro ianoni gong kror 20,556-kode revenue expenditure-na aro gong kror 9447-kode capital expenditure-na hisapenga ine Chief Minister parakataha.
Gong kror 2406-ni loan payment-ko changale, total expenditure-na gong kror 27,597-ko hisapenga ineba Chief Minister talate on·angaha.
Chief Minister-ni parakatani gitade, 2025-26 bilsio interest payment-na gong kror 1347-ko aro pension payment-na gong kror 1824-ko hisapenga.
“Uni gimin GSDP-ni 2.96 percent ong·gipa gong kror 1970-ni deficit budget-ko anga 2025-26 bilsina donangenga. Mongsonggipa budget baksana gong kror 5421-ni climate budget aro gong kror 6219-ni gender budget-koba 2025-26 bilsina donangenga,” ine Chief Minister aganaha.
“2032 bilsini gisepon Meghalaya a·dokko tang·dogimin a·dok ong·atna nisan donenga aro ia budget-an dal·rorona, kamrangko nakatatna aro manderangna an·seng baljokaniko on·na cholrangko on·gen,” ineba Sangma aganaha.
Chief Minister-ni janapatani gitade, 2023 bilsio MDA 2.0 sorkariko songani somoion, 2028 bilsini gisepo Meghalaya-ko 10 billion economy ong·atna aro a·dokni GDP-ko gong crore 42,697-oniko changgni dake gong crore 85,000-ona bariatna nisanko donmanahachim.
Meghalaya a·doko lekka porako namdapatna gita sorkari, gong crore 3,654-ko Education department-na chamenga ineba Chief Minister parakataha.
Ia 2025-26 bilsini gisepo Health & Family Welfare-na gong kror 2176-ko, PWD-na gong kror 2,873-ko, Power department-na gong kror 1088-ko, PHE-na gong kror 866-ko aro Agriculture & Farmers Welfare department-na gong kror 618 tangkarangko chamenga ineba Chief Minister parakataha.
