SHILLONG: Meghalaya a·doko Jal Jeevan Mission (JJM)-ni kamrangko ka·anio watchanggala man·gipa nokdangrangnaba chirangko sokate on·china Dadenggre-ni TMC MLA Rupa Marak didiangaha.
JJM project-ni bidingo Assembly-ni budget session-o sing·doangengon, Dadenggre constituency-ni ning·o donggipa song damsao pilak nokdangrangnan chi pipe-rangko sale on·manaha ine a·kangengoba, ia nokdangrangoni ge·saba chi pipe-rangko soke man·kujaenga ine Marak matnangataha.
Uni sing·anirangna aganchakaniko on·angskaengon, ia jolrangko Dadenggre Water Supply Scheme-ni ning·o man·chapataha aro ia songo donggipa nokdang ge 103-oni ge 88 nokdangrangnade chi pipe-rangko sale on·ahaoba bangki ge 15 gital nokdangrangde biming segatani somoio dongjachim ine a·dokni PHE Minister Marcuise N Marak parakatskaaha.
Ia songo JJM-ni kamrang ja·manchakenga ong·ja indiba matchotmanaha ine janapatskaengon, bangki dongenggipa ge 15 nokdangrangnaba chi pipe-rangko sale on·na gita gital scheme-ko tariskaaha ine PHE Minister talataniko on·angaha.
Minggipin sing·aniko dakangskaengon, chi tengkiko rikgipa biapni gimin Dadenggre MLA sing·doangenba, ia tengkiko PHE department, ru·uta bilsirangna skangan rikaha aro Dadenggre-ode JJM-ni ning·o chi tengkiko rikaan dongkuja ine parakataha.
Iana aganchakaniko on·angengon, ian augmentation minggipa project ong·a aro ia augmentation-ni ning·o sorkari, badia nokrango chi pipe-rang dongjachim, uarangosa tarie on·skaaia ine Minister parakataha.
Ia augmentation project-ara, je nokdangrangon chi pipe-rang dongkujachim, uandakgipa nokdangrangna chi pipe-rangko sale on·anisa ong·a ineba ua aganaha.
