TURA: Guwahati-oni Mendipathar-ona taribagipa rel ramako South Garo Hills a·jani headquarter Baghmara-ona aro Bangladesh a·songni skotong Dhaka songjinmaonaba tariangchina South Garo Hills MLA-rangni, Chief Minister Conrad K Sangma-na sedoatani ja·man iako Garoland State Movement Committee (GSMC) jegalatskaenba, niam gri napsrukanirangko champengna Inner Line Permit (ILP)-ko ra·gatchengchina dabiangaha.
Baghmara aro Dhaka-ni gisepo rel ramarangko tarichina MLA-rangni didianiko jegalatengon, Meghalaya a·doko aro mongsongbate Garo Hills-ni dingtang dingtang biaprango skangonin Bangladesh aro gipin biaprangoni manderang niam gri re·napbae songdong a·chatokengani gimin niam gri napsrukaniko champengna rakgipa niamrangko ra·gatchenggija a·song damgnini gisepo rel ramarangko tariahaode, niam gri napsrukbae songdong a·chagiparang bang·batgnok ine GSMC-ni organizing secretary Jason Tekrang M Sangma parakataha.
“Da·alo Garo Hills-o, mongsongbate Meghalaya aro Assam-ni simarang baksana Bangladesh a·song baksa nangchapgipa biaprango niam gri re·napbae songdong a·chaanirangko an·ching bang·en nikna man·enga. Ia niam gri songdong a·chaenggipa manderangko biaptangtangona watatpilna gitasa sorkari kamko ka·na nangenga,” ine GSMC-ni organizing secretary janapatenba, Baghmara aro Dhaka-ona rel ramarangko tariangna skang, niam gri napsrukanirangko champengna gita ILP-ko ra·gate on·chengna nanga ine sorkario dabiangaha.
Baghmara aro Dhaka-ona rel ramarangko tarianggenchimode, a·song damgnini bading chiwalgrikaniko bilakbatatna chol ong·e, ian South Garo Hills a·janasan ong·aigija salgro salaram jol gimiknan namgni ong·gen ine a·dokni Education Minister aro Rongara-Siju MLA Rakkam A Sangma baksana South Garo Hills a·jani MLA-rang, Chief Minister-na chittiko sedoatahachim ine nikna man·a.
Indake ong·engon, Meghalaya a·dokni gipin bakrango gitan Garo Hills-oba namroro silroroaniko ra·bana man·na gita Tura-ko Winter Capital songchina gitaba GSMC, a·dok sorkario dabiangaha.
