TURA: Da·o ong·atenggipa Meghalaya Legislative Assembly-ni Budget Session-o Tura-ko Winter Capital songani bidingo darang A·chik MLA-rangan ku·rang on·jaenga ine A·chik State People’s Front (ASPF), suk ong·gijaniko parakataha.
ASPF-ni parakatani gitade, Tura-ko Winter Capital songaniara Garo Hills-o songdongenggipa manderangni ru·uta bilsirangna dabienggipa ong·achim indiba iani bidingo Garo Hills-ni MLA-rang saksaba Assembly-o ku·rang on·jaenganiara an·tangtangni manderangna simsakgijaniko mesokani ong·enga.
“Tura-ko Winter Capital songani bidingo da·o ong·atenggipa Budget Session-o Garo MLA-rangni ku·rang on·jaengani gimin chinga suk ong·gijaniko parakna ska maina Tura-ko Winter Capital songaniara Garo Hills-o namroro silroroaniko ra·bana gita Garo Hills-o songdongenggipa manderangni ru·uta bilsirangna dabienggipa ong·achim,” ine ASPF-ni dilgiparang parakataha.
Tura-ko Winter Capital songchina dabianiara gital dabiani ong·ja ine janapatengon, ian Meghalaya a·dokko man·dile on·anggipa pagitchamrangni Garo Hills-oba namroro silroroaniko niksamsoe songgigrikanisa ong·achim ine ASPF parakataha.
Tura-ko Winter Capital songgenchimode Garo Hills-ni manderangnaba sorkarini kamrangko nambate dangdike on·asan ong·aigija, Garo Hills-o songdongenggipa manderang aro sorkarini gisepo nambate agangrikna cholrangba ong·genchim ineba ASPF parakataha.
“Indake ong·genchimoba, da·o ong·atenggipa Budget Session-o Garo MLA-rangoni saksaba ku·rang on·jaenganiara namen dukni ong·a maina Tura-ko Winter Capital songchina dabienggipa Garo Hills-ni manderang, an·tangtangni seoke watatgipa dilgiparangkon iani bidingo bilake ku·rang on·china nangniktokengachim. Garo MLA-rangni Tura-ko Winter Capital songani bidingo ku·rang on·jaenganiara joltango namroro silroroaniko ra·bana gisik nanggijaniko mesokanisa ong·enga,” ine ASPF-ni dilgiparang parakataha.
Garo Hills-ni namgnina kamko ka·ani aro ku·rang on·aniara seokako man·gipa dilgiparangni daitoan ong·a ine janapatskaengon, Garo Hills-oba namroro silroroaniko ra·bana man·na gita pilak A·chik MLA-rangkon, iani bidingo bilake ku·rang on·china ASPF didiataha.
