SHILLONG: Bilsi 15 batpile Meghalaya Cabinet-o North Garo Hills a·jani MLA saksakoba rimnapa dongkujaengani gimin ia bilsiode North Garo Hills a·jani MLA saksako Cabinet-o rimnapani cholrang donga ine mitam manderang ka·dongsotokenga.
National People’s Party (NPP)-ni dilgipa aro Resubelpara-ni MLA Timothy D Shira-ni aganani gitade, Meghalaya Cabinet-o North Garo Hills a·jani MLA saksako rimnapchina ru·uta bilsirangonin a·jani manderang nangniktokengachim indiba da·o dipet darangba iani bidingo Chief Minister-o dabigiparangde dongskakujaenga.
“Chingni MLA-rangko Cabinet-o biap on·china chinga dabia dongja aro iani bidingo Chief Minister-na maming sinjetanirangkoba on·jawa. Indiba a·dokni Cabinet-o komibeoba a·jani MLA saksana biap on·aniko mitam manderang nangniktokengachim,” ine Shira aganaha.
MDA sorkarina skang, Chief Minister Mukul Sangma-ni somoioba namgipa candidate-rang dongjani a·sel North Garo Hills a·jani MLA saksaba Cabinet-o biapko man·jahachim.
Iani bidingo dabina nangani katta dongja ine janapatskaengon, da·o dipet a·dokni Chief Minister, Cabinet-ni biaprangko sualtaina nangnikkujaengoba North Garo Hills a·jani MLA saksana ja·mano biapko on·ani cholrang donga ine Resubelpara-ni MLA aro Assembly-ni Deputy Speaker TD Shira parakataha.
