Tura: Meghalaya-ni South West Garo Hills District-ni Mellim Deficit School-o International Women’s Day-ko mejalo maniani bako me·tra bi·sarangko aro chadambe me·chikmarangko bil gnangatna ja·ku de·anio me·chikni bewal nikanio rongtale rakkiani bidingo awareness programme-ko ong·ataha aro chadambe me·chikrangna aro me·chikmarangna sanitary pad-rangko suale on·angaha. Poraigipa me·chik bi·sarangna aro jatni manderangna indakgipa bosturangko on·ani ian skanggipa ong·enga.
Skulni assistant skigipa Jesmine Ch. Momin, uni aganao nangchongmotgipa u·iani aro me·chikni bewal nikao jakkalani bosturang baksa wilwilao poraigipa me·tra bi·sarang aro chadambe me·chikrangko rongtale rakkina nangako aro skie on·a miksonge Chief Minister’s Special Grant-ni dakchakanichi Gambegre constituency-ni MLA Mehtab Chandee Sangma sanitary pad-rangko suale on·angaha ine aganaha.
Dingtamgmancha bilsi 11-oni bilsi 18-ona, class six-oni 10-ona ong·gipa me·chik bi·sarangni gisepo bewal nikao rongtale rakkiani mongsonggipa ong·aniko agan-ku·pattie on·a program-ni miksongani ong·a.
Skul-ni skigipa Careen R. Marak, program-ko chalaiaha aro program-o bakko ra·gipa poraigiparangna, ma·gipa-magiparangna aro songni manderangna mikrak-u·iataniko dakaha. Me·chikni bewal nikao rongtale rakkiani mongsonggipa ong·aniko ma·sie skul, jakkaltaina man·gipa ba·rani pad-rangko aro u·iataniko seegipa chonbegipa lekkarangko suale on·angaha.
Jakkaltaina man·gipa sanitary pad-rang poraigipa bi·sarangna dakchakani ong·gen maina uko bilsi 3-oni bilsi 5-ona jakkalna man·gen aro dingtangmancha mikka wachi kareo jeon Ringdi chibimachi bilsianti chi bana ong·gipa a·jolrango donggiparangna namgni ong·gen. Chi banani somaio skul aro bang·a sepangjolni songrangko ua somai chi banachi mripa somai changantio rongtale dongna gita chol ong·ja maibakai ia pad-rang bewal nikani somaio da·o dakchakaniko on·gen, Careen R. Marak aganaha.
South West Garo Hills District-o Mellim Deficit Secondary School-o sak 300-mang chatro-chatrirangoni sak 130-de me·chikrang ong·a. Skul, Garo Hills-ni skotong Tura-ni adita kilometer 30-mang chel·ao donga.
Jakkaltaina man·gipa suale on·gipa pad-rangni gimin altuae ma·sina man·a gita ku·siktangchi che·em che·em talate on·aha. Rongtale rakkiani, bewal nikmitingo namen simsakan baksa me·chikrangko bil gnangatna suale on·gipa chongipa lekkao talbate ku·pattianirangko on·aha.
