SHILLONG: Meghalaya a·doko gital district-rangko bikotanio a·dok sorkari, Garo Hills-kode watchanggalaha ine Dadenggre-ni TMC MLA Rupa Marak, suk ong·gijaniko parakataha.
Sombar salo, Budget-ni bidingo chanchirimanio bak ra·angpaengon, Khasi aro Jaintia Hills a·ja jolrango gital district-ko songgenchimode, Garo Hills-oba gital district-ko sorkari songrongachim indiba batanggimin somoirango Meghalaya sorkari, Mairang-kosan district songaiaha indiba Garo Hills-ode gital district-ko songjaha ine Marak parakataha.
Dadenggre Civil Sub-Division-ko ta·raken district songna nangenga ine dabiangengon, uni constituency-o bang·a project-rangan matchotgija dongtokenga ine Dadenggre MLA, an·tangni suk ong·gijaniko parakataha.
Jakkalgija galchipe donenggipa Baljek Airport-ni bidingo janapatskaengon, ia airport-ona manderang sildorengrangni onchonganikosa senge dongtokengachim indiba ia airport-o bilsiantian Megong Festival-sa onchongrongskaenga ine Marak aganaha.
Jengjal-o sildorengrangni onchonganikosa manderang nangniktokenga ine janapatskaengon, Jengjal-o bilsigittamna skang kuligipa Oxygen Plant-koba da·o jakkalgija donaienga ine Marak parakataha.
“Badiaba project-ko a·bachengataiahani giminde uanon kamrang matchotaiaha ong·ja,” ine ua aganenba, Dadenggre constituency-ni ning·o matchotgija dongenggipa bang·a project-rangan manderangna nitogijaniko ong·atenga ine Marak aganaha.
Dadenggre constituency-o police station damsakoba Forest IB-onisa chalaienga aro MePDCL office-koba Block office-ni quarter-rangosa chalaienga ineba Marak aganaha.