SHILLONG: 2008-09 bilsio Lower Primary skulni skigiparangko seokanio ong·gija dakgipa case-ni sak 200 sakkirangko den·galna gita kachari tik ka·angaha.
Ia case-o a·dokni cabinet minister ong·enggipa Ampareen Lyngdoh-ko man·chape gimik sakgittam manderangko dosi potahachim aro ia manderangara, sorkarini LP skulna skigiparangko seokanio, ong·gija dakna jotton ka·ahachim.
Ia case-ni bidingo sandirokna gita Meghalaya High Court, Central Bureau of Investigation (CBI)-na pakwate on·ahachim.
Indake ong·engon, ia case-o gimik sak 492 sakkirangko biming segataha aro da·o dipet sak 28-kode sing·sandie nimanaha ine DSGI Dr N Mozika, Chief Justice IP Mukerji-ni mikkango parakeaha.
Iana skang kacharini ge·etgimin gita, ia case-ko nama bewalo ta·rake matchotatna sakkirangko komiatna nangenga aro nangchongmotgipa sakkirangna agrede gipinrangko den·galchina High Court-ni Single Bench raiko on·angaha.
Uandaken, gimik sak 492 sakkirangoni sak 200 sakkirangko den·gale sak 292 sakkirangkosan sing·sandina tik ka·angaha aro uamangoni sak 28-kode sing·sandimanaha ine ukil parakataha. Iani bidingo bichalko ka·enggiparang, New Delhi-o donggipa CBI headquarter-oni ra·chakaniko sengkuenga.
Iani bidingo kacharini skanggipa ge·etaniko 2024 bilsini December 9 tariko on·angahachim indiba ua somoio sakkirangni bimingrangko CBI tik ka·na man·jahani gimin mijal Mongolbar salona, kachari tarikko re·anggipa February 20 tariko donangskaahachim.
Ia case-ni bidingo bichal ka·aniko ta·rakbatatna man·na gita sakkirangko sing·sandina on·angkuchina ine DGSI, kachario mol·molangaha.
