SHILLONG: Meghalaya State Investment Promotion Facilitation (MSIPF) Act 2024-ko jegalenba Mongolbar salo, Khasi Students Union (KSU)-ni membor-rang, Meghalaya Legislative Assembly-ona re·jomangaha indiba uamangko sipai dolrang, Garrison Bridge-o champengsoaha.
Meghalaya State Investment Promotion Facilitation (MSIPF) Act 2024-ko Meghalaya State Investment Promotion & Facilitation (Amendment) Bill 2025 ine mingskaenba, Assembly-o pass ka·na ra·angahachim. Ia Act-o sorkari, para 34-ko ra·galenba, Meghalaya Land Transfer Regulation Act 1971-ni niamo nangchakeani dongjana gita ritingsako segatskaahachim.
Ia niamko pass ka·na sorkarini jotton ka·engani gimin jegalatengon, ia MSIPF-ara Tribal jatrangni aro land transfer Act-ni kosako re·ani gita ong·enga ine ia Act-ko ra·galpilchina KSU dabiangskaaha.
Iani bidingo kobor ra·timgiparangna talataniko on·angengon, MSIPF Act-ni ning·o Tribal-rang a·arangko gimaatgen aro a·arang gride Tribal-rang sia gita ong·aignok ine KSU-ni general secretary Donald Thabah parakataha.
Iani bidingo uamang dingtang dingtang cholrangchi sorkarina u·iatna jotton ka·ahachim ine janapatengon, “A·arangko private investor-rangna on·aha ong·ode uan Land Transfer Act-ni kosako re·ani gita ong·engahani gimin chinga ia niamko ra·galpilchina sorkarina cholko on·aha,” ine Thabah aganaha.
Land bank-rangko bikotaniara namen kenna nanggipa ong·a ine janapatskaengon, a·arangko private investor-rangna on·genchimode Tribal-rangsa noksan ong·na nanggnok ine KSU-ni general secretary parakataha.
Khasi-Jaintia Hills jolrangona rel rama taribaanikoba uamang jegalenga ineba Thabah aganaha.
“Rel garirangko nangchongmota ine chingaba ma·sia. Rel garirangko ra·baahaode nangchongmotgipa bosturangni damrang komibatgnok ine mitam manderang agantokenga, indiba Shillong-de Guwahati-oni km 100-san chel·grikaia aro Imphal-de Guwahati-oni km 300-mangni gita chel·grika. Indide maini gimin Manipur a·doko Meghalaya-na bate bosturang dam nom·batskaa? Manipur-oba rel garirang dongjani gimin ia sing·ani ong·katenga,” ine KSU-ni general secretary aganaha.
Meghalaya a·dokona niam gri napsrukanirangko chel·chakna gita Inner Line Permit (ILP)-ko ra·gate on·jaengani giminba KSU sing·doangaha.
