SHILLONG: Nekikona Combined Water Supply Scheme-ni kamrango ong·gija dakanirang donga ine matnanganirangko Centralized Public Grievances Redress & Monitoring System (CPGRAMS)-ni sandirokanio maming ong·gija dakaniko nikjaha ine Mongolbar salo, a·dokni PHE Minister Marcuise N Marak, Assembly-o parakataha.
Ia Water Supply Scheme-ni kamrangko ka·anio ong·gija dakanirang donga ine matnangenba, re·anggipa bilsio Meghalaya Lokayukta-na badi ka·doangahachim ine nikna man·a.
Iani bidingo, Rajabala constituency-ni MLA Dr Mizanur Kazi-ni sing·anirangna aganchakaniko on·angengon, ia badi ka·aniko CPGRAMS-ona pakwatataha aro iandake matnanganirangko CPGRAMS-ni gita sandirokanio maming ong·gija dakanirangko nikna man·jaha ine PHE Minister parakataha.
Ia project-ni kamrang 87 percent-ni gita matchotaha ine Minister-ni aganchakaniko jegalatskaengon, biapona re·ange nigenchimode obostarang namen dingtanggrika ine Rajabala MLA a·kangataha.
“Minister-ni aganani gitade, Nekikona Combined Water Supply Scheme-ni kamrang 87 percent matchotaha indiba chong·motko nigenchimode pilak dam 26 songrangon pipeline-rang dongkuja,” ine Dr Kazi aganaha.
Iani bidingo aganchakaniko on·angengon, inquiry report-ni gitade, Jal Jeevan Mission (JJM)-ni dashboard-o seani aro biapo ong·enggipa obostarang dingtanggrikani donga indiba ia dingtanggrikaniko meliatchina aro kamrangko ta·rakatchina contractor-ko didiaha ine Marak parakataha.
Ia project-ni ning·o dam 25 songrango donggipa nokdangrangna chi pipe-rangko sale on·ani 48 percent-ni gita matchotmanaha aro bangki kamrangko da·o jagni jagittamni gisepon matchotgnok ineba PHE Minister parakataha.
