SHILLONG: Meghalaya a·doko niam gri koela bikota aro salruraa ine matnangenggipani bidingo sandirokna gita Meghalaya High Court-ni songe on·gipa Justice (Retd) BP Katakey committee-ko a·dok sorkari bon·atna jotton ka·enga ine Meghalaya a·dokni Bharatiya Janata Party (BJP) matnangatenba, ia committee-ni sandirokaniko matchotna on·china sorkariko didiataha.
Meghalaya BJP-ni chief spokesperson Mariahom Kharkrang-ni parakatani gitade, a·doko niam gri koelarangko bikotenga aro salruraenga ine bang·en badi ka·anirangko man·soahani giminsa Meghalaya High Court, iani bidingo sandirokna gita Justice Katakey committee-ko songaha aro iani bidingo kakketko ma·sina man·na gita ia committee-ni sandirokaniko matchotna on·na nangenga.
“Ia committee-ko Meghalaya High Court-sa songe on·aha aro ia committee-ni inquiry-ko matchotna gita on·na nangchongmota. Ia committee-ko da·o bon·atgenchimode, ian manderangona ra·baenggipa kakket bichalko champengani gita ong·gen. Justice Katakey committee-ko ra·gale galani pal sorkari, niam gri koela bikotani aro salruraanio jak donggipa manderangko rim·nasa jotton ka·na nanga,” ine Kharkrang parakataha.
Manderangni namgnina kamko ka·gipa party ong·e, Justice Katakey committee-ko sorkarini ra·galna miksonganiko BJP raken jegalenga ineba Kharkrang parakataha.
“A·doko niam gri koela bikota aro salruraenga ine matnanganirangko talbate ma·sina gita BJP state unit-ba dingtangmancha committee-ko songaha aro ia committee-ni am·sandie man·aniko ja·mano ma·mongni dilgiparangna u·iatgen,” ine BJP-ni state spokesperson M Kharkrang parakataha.
