SHILLONG: Meghalaya a·doko bijoliko jakkalenggipa bang·bata nokdangrangan nangana bate bijolini kajinarangko gamna nangtokengani gimin Budbar salo, Opposition dolrang a·dok sorkariko matnangatenba, ian sorkarini chu·sokgijagipa kamrangna korosrangko a·dokni manderango galgopa gitasa ong·enga ine parakataha.
Iani bidingo Opposition dolni dilgipa Mukul Sangma, Assembly-o chanchirimaniko ra·baengon, 2005-2006 bilsirango grant-na gitcham sorkarini bi·atgipani bidingo janapangenba, Meghalaya Energy Corporation Limited (MeECL)-o tangka paisarangko jakkalsretani a·sel, a·doko songdongenggipa ramram manderangsa neng·nikanirangko chagrongna nangskaenga ine matnangataha.
Skatang koros ka·ani, chanchisoani gri kam ka·ani aro nangana bate ra·sroani grorangko da·o manderangnasa bijolini kajinarangko bate on·skana jotton ka·enga ineba Sangma aganaha.
Economy-ko tang·doatna gita karkanarangko chalaina nangengani gimin janapatengon, bijolini kajinarangko ra·anio karkanarangkode watenba, ramram manderangonikosa kajinarangko bate ra·aniara kraani ong·ja ine Opposition dolni dilgipa aganaha.
Bijoliko jakkalanio maikai kajinarangko hisapenga, uarangko talate on·china gitaba Sangma, a·dok sorkario dabiangaha.
Kros 100 nanggipa project-na sorkari kror 150 tangkarangko koros ka·enga ine matnangatengon, ia korosrangko basako man·pilna ka·dongenga ineba Sangma sing·doangaha.
Comptroller & Auditor General (CAG) report-ni bidingo janapatengon, Power department-o gong kror 200-mang ong·na sipile korosrang ong·aha aro korosrang ianaba batenggen ine Sangma aganaha.
Ganol Hydroelectric Project-ni bidingo an·tangni jajrengchakenganiko parakatskaengon, ia project-ni kamrango rang·san korosrang tang·doangahani gimin sorkariko Sangma sing·doangaha.
Meghalaya a·dokna badita bijolirangko breenga aro baditaba ia bijolirangko sorkari palskaenga, uarangni giminba Opposition dolni dilgipa, a·dok sorkariko sing·doangaha.