SHILLONG: Tura Government Medical College-ko rikani kamrang da·o 75 percent-ni gita matchotaha ine Budbar salo, a·dokni Health Minister Ampareen Lyngdoh, Assembly-o parakataha.
Assembly-ni question hour-o Opposition dolni dilgipa Mukul Sangma-ni sing·anirangna aganchakaniko on·angengon, Tura Govt Medical College-ko rikani da·o 75 percent-de matchotaha aro ia medical college-na maharirangni on·gilgipa a·ara acre 99.00 ong·a ine Health Minister parakataha.
“Da·o dipet ia project-na India sorkarini chamatgipa tangkarangara gong crore 170.10 ong·aha, PMC-na a·dok aro ma·mong sorkarirangni chape watatgipa tangkarangara gong crore 185.65 ong·aha aro PMC-ni contractor-na watatgipa tangkarangara gong crore 178.66 ong·aha,” ine Lyngdoh aganaha.
Tura Medical College-ko 2026-2027 bilsini gisepon kulina sorkari nisanko donahani gimin ia nisanko chu·sokgipa ong·atna sorkari rakbee kamrangko ka·enga ineba Health Minister aganaha.
“Ia project-ara chingni ka·tongrango nangchakegipa project-an ong·a aro ia Tura Govt Medical College-ko 2026-2027 bilsini gisepo kulina nisanko donahani gimin ia nisanko chu·sokatna gita chinga rakbee kamrangko ka·enga,” ine Lyngdoh, ku·rachakaniko on·angaha.
Ia medical college-ni kamrangko name nipilna gita sorkari, National Medical Council (NMC)-ko okamatenga ineba Health Minister parakataha.
Lyngdoh-ni aganani gitade, NMC-ni dongimin niamrango pangchake medical college-rango ge 400 palangrang dongna nangani gimin uamang ge 180 palangrangko on·dapnaba sorkari krenge kamko ka·enga.