BAGHMARA: Baghmara Greater Water Supply Scheme-ni dal·gipa chi pipe-rangko su·pongenba chirangko Jal Jeevan Mission (JJM)-na jakkalskaengani a·sel Baghmara jillao songdongenggipa manderangna chirang chu·ongjaenga ine Baghmara Citizens Forum (BCF) matnangataha.
BCF-ni parakatani gitade, ru·uta salrangonin Baghmara jillao songdongenggipa manderang, chirangko chu·onga gita man·jae neng·nikanirangko chagrongna nangtokengani gimin BCF-ni membor-rang, re·anggipa Budbar salo, ia Baghmara Greater Water Supply Scheme-ni dal·gipa tengkiona Siju Rongdong-oniko salbaenggipa chi pipe-rangko nina re·angon, ia dal·gipa chi pipe-rangko su·ponge, chirangko JJM-na jakkalskaengani a·selan Baghmara Greater Water Supply Scheme-ni tengkio chirang gapna man·jaenga aro chirang namen komiaha ine nikna man·aha.
Iani bidingo apsan salon, BCF dolni membor-rang, GSU aro FKJGP-ni dilgiparang baksa tom·e chanchirimangaha aro South Garo Hills a·jani Deputy Commissioner-ko gronge badi ka·doangaha.
Deputy Commissioner-ko gronge badi ka·doangani ja·man BCF, GSU aro FKJGP-ni dilgiparang, PHE-ni Executive Engineer-koba gronge sing·sandianirangko dakangaha ine u·iataha.
“Baghmara jillao songdongenggipa manderangna ringani chiko on·enggipa Greater Water Supply Scheme-ni pipe-rangko su·ponge, JJM-na jakkalskaaniara niamni a·palo ong·a aro iako chinga raken jegalenga. Iani bidingo PHE-ni Executive Engineer-ko grongeani ja·man chinga JJM-ni contractor-koba okamate sing·sandion, ua iako junior engineer-ni ge·etaniko man·e dakaha ine chingna ku·rachakaha. Uni gimin da·o chinga iani bidingo joint inquiry-ko dakchina dabienga aro uni ja·man JJM-na jakkalenggipa pilak pipe-rangkon bon ka·pilchina dabienga,” ine BCF-ni dilgipa Chavan N Sangma parakataha.
