TURA: Meghalaya a·doko niam gri koela bikota aro salruraa ine matnangenggipani bidingo sandirokna gita Meghalaya High Court-ni songe on·gipa Justice (Retd) BP Katakey committee-ko a·dok sorkari bon·atna jotton ka·enga ine dingtang dingtang dolrang matnangtokengon, Justice Katakey committee-ko sorkarini bon·atna miksongengani gimin Garo Hills-oni Centre for Environment Protection & Rural Development (CEPARD) dolba raken jegalataha.
“Meghalaya a·doko National Green Tribunal (NGT)-ni niam gri koela bikotaniko champengatanio, Meghalaya High Court-ni songe on·gipa Justice Katakey committee, a·doko bang·en niam gri koela bikotanirangko sandirokenba jinmana parake on·na man·aha aro da·o ia committee-ko sorkari ra·galbebegenchimode ian a·dokni samtangtango ong·telaigiparangko ripinge rakkina kam ka·anio nangchakeaniko man·gnok,” ine CEPARD-ni CEO Cherian G Momin parakataha.
CEPARD-ni parakatani gitade, Meghalaya a·doko niam gri koela bikotaniko ru·uta somoirangonin champengna man·jaenga aro changni chang kachari ge·etanirangko on·ahaoba bilakgipa manderangan jak dongani gimin niam gri koela bikotani aro salruraaniko champengna man·jaengachim.
“Meghalaya a·doko dontonggija koelarangko niam gri bikote salenga ine Justice Katakey committee-ni report-o parakaha aro a·doko niam gri koela bikotaniko champengna sorkari changni chang ku·rachakaniko on·ahaoba, niam gri koela bikotani aro salruraaniko chu·gimik champengsrangna man·kujaenga. Iani a·selan a·dokni kajina man·anio noksan ong·na nangenga aro a·dokni samtangtango ong·telaigiparang nisigalako man·enga,” ine CEPARD parakataha.
Justice Katakey committee-ko ra·galna miksonganiara niam gri koela bikotanio jak donggipa manderangko chel·chakna jotton ka·anisa ong·enga ineba CEPARD parakataha.
“Ia committee-o gong lak 65 tangkarangko koros ka·na nangaha ine pa·sikani kattarangara namen kragijagipa ong·a maina niam gri koelarangko bikotani a·sel chiring chibisik, buring bolgrim, balwa aro pilak samtangtango ong·telaigiparangko tangatpilna kam ka·anion nangana bate koros ong·batenga. Uni gimin ia committee-ko bon·atani pal sorkari, a·doko niam gri koela bikotani aro salruraaniko champengnasa ja·kurangko de·na nangenga,” ine CEPARD parakataha.
