TURA: Songni manderangna rongtal an·tale janggi tangani aro uandakgipa dingtang dingtang kamrangni bidingo agan-talate on·na gita re·anggipa Bristibar salo, Garobadha-ni nangrimgimin dolrang, chong·motan ADIL, AYWO, ADE, FKJGP, AHAM aro gipin dolrang, Rerapara Block-ni Block Development Officer aro dingtang dingtang department-rang baksa awareness program-ko Rerapara C&RD Block-ni ning·o donggipa Koraitola songo ong·atangaha.
Ia program-ko ong·atanio, Rerapara Block-ni BDO A Ch Momin, mongsonggipa sokgipa ong·e, jinmana aganprakangengon, songni nokni namroro silroroanina sorkarini ra·gate on·enggipa dingtang dingtang scheme-rangni gamchataniko agan-talate on·angaha.
Sorkari scheme-rangko maikai ra·na nanga aro iandakgipa scheme-rangchi mai dakgipa namgnirangko man·achim, uarangni giminba Momin, agan-talate on·angaha.
Ia awareness program-ko ong·atanio, Garobadha Health Centre-ni official Dr Balnamchi A Sangma, songni nokni manderangna aganprakengon, an·tangtangko an·seng baljoke rakkina gita skatang bangbango a·pal re·jachina, songo noko toilet-rangko rike jakkalchina aro an·tangtangba rongtal an·tale janggi tangchi agan-ku·pattianirangko on·angaha.
Ia tom·anio, AYWO Garobadha regional unit-ni president Macken Sangma-ba jinmana aganprakengon, chiring chibisikrangko ripinge rakkina nangengani gimin aro songsalo rongtal an·tale janggi tangna nangani gimin songni manderangna agan-talatanirangko on·angaha.
Tom·aniko ADIL Garobadha regional unit-ni president Dean Marak dilangskaaha.
