SHILLONG: Meghalaya Investment Promotion & Facilitation Act (MIPFA) 2024-na niamrangko tarianio political party-rangko man·chape pilak dolrangkon okame agangrikna gita a·dok sorkari ku·rachakaniko on·angaha.
Iani bidingo, Home (Political)-ni Commissioner & Secretary Cyril Diengdoh, Khasi Students Union (KSU)-ni president Lamborstarwell Marngar-na seatgipa chittio parakataha.
Adita salrangna skangsan, KSU-ni dilgiparang, a·dokni Chief Minister Conrad K Sangma aro gipin official-rang baksa tom·enba, MIPFA-ko ra·galpilchina dabiangahachim ine nikna man·a.
MIPFA-na niamrangko tarianio pilak dolrang baksa agangrikchenggen ine ku·rachakaniko on·atengon, “Na·simang agan-ku·pattianirangko man·e Meghalaya Investment Promotion & Facilitation Act 2024-na niamrangko tarianio pilak dolrang baksa agangrikchengna sorkari tik ka·angaha,” ine KSU-na seatgipa chittio, Home (Political)-ni Commissioner & Secretary parakataha.
Assembly-ni Budget Session-o parakatgipa amendment Bill-o dingtang dingtang dolrangni nangnikani aro nangnikgijanirangko nienba taridapaha ine talataniko on·atengon, ia MIPFA-o Meghalaya Transfer of Land (Regulation) Act 1971-ko pe·ani dongjawa, autonomous district council (ADC)-rangni niamko re·badejawa, joltangni manderangna kam ka·e cha·ani cholrangko on·e, 90 percent-de non-managerial aro 50 percent-de managerial-ni kamrang ong·gen ine sorkari official parakataha.
Land bank-ko MIPA bregen ine kenchakenggipana aganchakaniko on·angengon, dingtang dingtang dolrangni nangnikanirangko sorkari nie ra·aha aro iarangko chu·sokate on·na kam ka·gen ine sorkari parakataha.
