TURA: Tura-ko Winter Capital/Second Capital songchina dabienggipani bidingo songni nokni dilgiparangna aro manderangna agan-talatanirangko on·na gita re·anggipa Sonibar salo A·chik State People’s Front (ASPF)-ni brigipa awareness campaign-ko East Garo Hills a·jani Williamnagar-o donggipa Rongrenggre kal·chakramo ong·atangaha.
Ia tom·anio, East Garo Hills a·jani dingtang dingtang biaprango songdongenggipa manderang aro dingtang dingtang dolrang, jekai A·chik Progressive Approach (APA), Garo Hills Enlightenment Society (GES), aro Williamnagar Auto & Pick-Up Association-ba bak ra·angtokaha.
Ia program-ko ong·atanio ASPF-ni general secretary Bernita R Marak, jinmana aganprakengon, Tura-ko Winter Capital songaniara Meghalaya a·dokko man·e on·dilanggipa pagitchamrangni ku·rachakgimin kattarangan ong·a ine iako chu·sokatchina a·dok sorkariko didiangaha.
Garo Hills gimiko songdongenggipa manderangni namgnina Tura-ko Winter Capital songchina dabianio bakrimaniko on·china gitaba ua East Garo Hills a·jao songdongenggipa manderangko didiangaha.
Ia tom·anio APA-ni president Roger D Shira-ba jinmana aganprakangengon, Tura-ko Winter Capital songchina dabianirang chu·sokkujaskal uamang, ia dabianio bakrimaniko watgaljawa ine ku·rachakaniko on·angaha.
Ia tom·anio GES-ni president Slang Goera Marak-ba jinmana aganprakengon, Tura-ko Winter Capital songchina dabidilengani gimin aro iani bidingo manderangna talatanirangko on·na rakbee kam ka·engani gimin ASPF aro Garoland State Movement Committee (GSMC)-ni dilgiparangko mittelpilangaha. Iani bidingo uamang, dal·begipa tom·anirangko East Garo Hills a·jao ong·atanggen ineba Marak parakataha.
Ia tom·bimonganiko ong·atanio GSMC-ni acting chairman Balkarin Ch Marak-ba jinmana aganprakengon, Tura-ko Winter Capital songchina dabienggipani bidingo agan-talatanirangko on·na gita changgipin tom·aniko North Garo Hills a·jao ong·atangskagen ine parakataha.