SHILLONG: A·doko bobil dake chakatenggipa Hynniewtrep National Liberation Council (HNLC) dolni kosako ma·mong sorkari, bilsi bongana ‘ban’ ba champengattaiahani gimin HNLC bobil dolni dilgiparang, Unlawful Activities (Prevention) Tribunal-ni mikkango ia champengataniko warachakna tik ka·angaha.
Iani bidingo HNLC bobil dolni pal kachario warachakna gita dingtangmancha Fernando Shangpliang-ko bobil dolni ukil dake March-ni 6 tariko seokangaha.
Iani bidingo kobor ra·timgipa manderangna talataniko on·angengon, uko HNLC-ni chairman Bobby Marwein aro general secretary Sainkupar Nongtraw, HNLC-ni ukil-na seokaha ine Budbar salo, Shangpliang parakataha.
Re·baenggipa March-ni 22 tariko Shillong songjinmani State Convention Centre-o Tribunal-ni hearing-ko ong·atengani gimin ua, HNLC-ni pal kachario mikkangpagen ineba Shangpliang aganaha.
Iani bidingo HNLC-ni ku·baltitimgipa aro HNYF-ni president Sadon K Blah-ba talataniko on·angengon, “HNLC-ni kosako je matnanganirang dongachim, ia pilakkon uamangni ukil, kachario warachakgnok. HNLC-ni kosako dingtang dingtang dake matnanganirang, mongsongbate rim·a man·gipa pilakan HNLC-ni manderang ine matnanganiranga kakket ong·ja,” ine Blah aganaha.
HNLC bobil dol, tom·tomaniona re·bapilna nangnikenga aro iako sorkari ma·sichakna nanga ineba ua aganaha.
HNLC bobil dolko tom·tomanina agangrikaniona re·bapilna on·na man·na gita Tribunal kamko ka·na nanga ineba ua aganaha.
