World TB Day-ko, Asanang Multi-Facility Centre-o mania

TURA: West Garo Hiills a·jani, District Tuberculosis Centre-ni gita, Sukkrobar salo, World TB Day-ko  Asanang Multi-Facility Centre-o manianga. Ia manianganiko  “Yes! We Can End TB-Commit, Invest, Deliver” ingipa   kattarango pangchake maniaha. Indake ia program-o, Asanang Secondary School-ni chatro chatrirang, skigiparang, aro Village Health Committee (VCH)-ni membor-rang baksa Rongram Block-ni Child Development Project Officer (CDPO) Smti. Chingsime N. Sangma mongsonggipa sokgipa ong·e bakko ra·angaha. Programme-ni a·bachenganio, West Garo Hills a·jani, District Tuberculosis Officer (DTO) in-charge Dr. Riksilchi Sangma, TB sabisini a·bachengani, chinrang, aro naljokani cholrangko agan-talate on·aha, sabisiko saksa sakgipinona batrikrikataniko champengna gita, TB sabisiko man·e dongenggipa mande ku·sikrango rim·tipe gusuna ba atchingna nanga ineba didianiko on·angjolaha.
Mande TB sabisiko man·ahaon, sannaniko ra·jagenchimode, sabisiko man·gipa mande bilsion gipin sak 10-15  manderangona sabisiko batatna gita man·a, ine agane programme-o skie ra·enggipa sakantikon ia mikrakataniko songsalo gipatroroate, mikkangchi TB sabisiko songsalo bonatsrangna didianikoba on·aha. Una agreba, Rongram Block-ni CDPO, Chingsime N. Sangma jinmana agananio, TB-ko dakrikanio aro cheanio, be·en-ko bilake rakkina gita namgipa cha·a ringaniko ranta ka·na nanga ine agane, TB sabisiko songsalo bonatsrangna gita, sana bananirangko on·enggiparangni jakosan ong·aija indiba, sakanti manderangan- skul, college aro gittimantirangon TB-ni gimin mikrakataniko on·giparang ong·na gita man·a ineba didianiko on·angjolaha.