TURA: Tura-ko Winter Capital songchina dabienggipani bidingo manderangna u·iataniko on·na gita Sonibar salo, A·chik State People’s Front (ASPF), dingtangmancha bike rally aro poster campaign-ko ong·atangaha.
Ia bike rally aro poster campaign-ko North Garo Hills a·jani Gokol songo a·bachengataha aro Bajengdoba, Pedaldoba aro Raksamgre songrang gita re·jomange, West Garo Hills a·jani Kamari Tikrikilla-o matchotateaha.
Ia bike rally aro poster campaign-ko ong·atani bidingo ASPF-ni chief organizing secretary Raksim Marak talataniko on·angengon, Tura-ko Winter Capital songchina dabienggipani bidingo dingtang dingtang songni manderangna u·iatanirangko on·na aro uamangni dabianiko bilakbatatna ong·ataha ine parakataha. Tura-ko Winter Capital songchina dabianiko sorkari chu·sokate on·kujaskal uamangni dabianiko dontongjawa ineba Marak aganaha.
Bike rally, Kamari (Tikrikilla) songona sokangani ja·man, ASPF Eastern Zone-ni adviser Ronald Sangma, ia bike rally aro poster campaign-o bak ra·giparangko mittelpile, ia campaign-ko matchotataha.
