TURA: Robibar salni bako, Tura aro Williamnagar-ni dingtang dingtang biaprango skatang garirangko salanichi, a·sel ong·e sakgittam chadamberang, janggitangtangko gimaatna nangaha.
Police-rangni u·iatani gitade, ia damgni biaprango a·sel ong·aniara, gariko simsakgija ta·rakdugae salani a·selsa ong·aha.
Koborko on·ani gitade, Robibar pringni bako, Tura Araimile-ni Kendriya Vidyalaya Central School mikkango, sakgittam manderangni gadoe re·baenggipa motorcycle, mikkangchini re·baskaenggipa Maruti car baksa chatinggrike a·sel ong·aha aro ia a·sel ong·anio Lower Walbakgre Holy Cross Hospital joloni bilsi 25 ong·gipa Wasa M Sangma, skoo bilongbee mata bu·aniko man·na nangaha. A·sel ong·ani ja·man bakan uko sanna bananirangko on·na Tura Civil Hospital-ona ra·angahachim indiba hospital-ona sokangani ja·man adita somoirangni gisepon ua janggi galaiaha.
A·selo ga·ake saknaa man·gipa gipin sakgniko chadamberangkoba hospital-ona ra·ange sanna bananirangko on·engkua. Koborko on·ani gitade, ia sakgni chadamberangba bilongbee mata bu·anirangko man·aha.
Indake ong·engon, apsan Robibar attamni 6:30 bajimango, Williamnagar-oni adita chel·ao donggipa Bansamgre songoba, Gypsy gari bolsa, chiring donggipa a·kuangchina ga·akonange a·sel ong·aha aro ia a·sel ong·anioba mande sakgni janggiko gimaatna nangaha.
Ia a·sel ong·anio sianggipa mande sakgniara, Samanda Dolwarigre-oni bilsi 28 ong·gipa Tengjring M Marak aro South Garo Hills a·jao donggipa Rongara Chengni songni bilsi 24 ong·gipa Billar R Marak ong·a ine police-rang u·iataha.
Police-rangni u·iatani gitade, ia gariara dolsa NGO-ni dilgipa Saljrang R Marak-ni gari ong·achim aro a·sel ong·ani somoio ia gariko Williamnagar Balsrigittim-oni bilsi 28 ong·gipa Dikrikchi N Sangma salengachim.
Gari a·sel ong·anio uamang sakgniba bilongbee saknaanirangko man·aha aro ja·mano uamangko Williamnagar Civil Hospital-ona ra·angaha.
