Skanggipa CM-ni depante aro gitcham MDC-ni nokko wa·al kama

TURA: Meghalaya a·dokni skanggipa Chief Minister Capt Williamson A Sangma sagini depante aro Garo Hills Autonomous District Council (GHADC)-ni gitcham MDC Fersen Ch Momin-ni nokko, mijal Mongolbar salni bako rang·san wa·al kamaha.
Ia nokko wa·al kamanichi samba jolrango donggipa manderang kenjagokatako man·tokaha maina ia nok sambaon LPG agency aro ia biaponi adita chel·aon AOC petrol pump-ba dongachim.
Ia nokko wa·al kamani somoio nokdangni manderang gipin biaposa ong·e darangba saknaanirangkode man·jaha indiba wa·al kamanio nokni bang·bata bakrangan nosto ka·ako man·tokaha.
Fire & Emergency Service (F&ES)-ni Superintendent of Police (SP) BA Sangma-ni u·iatani gitade, ia nokko wa·al kamani bidingo uamang Mongolbar pringni 11:00 bajimango kobor man·soaha aro bakan ua biapona wa·al kimitgipa garirangko watataha.
Wa·alrang namen bilakahani gimin ia biapona dakchakna gita Rongram, Dalu aro Garobadha-ni wa·al kimitgipa garirangkoba aganataha aro unbaksana Tura Municipal Board (TMB) aro Public Health Engineering (PHE)-ni chi salgipa garirangkoba ia biapona okamataha ine Sangma parakataha.
Kontagnimangna chirangko satani ja·man bon·kamao F&ES-ni sipairang, wa·alko kimitna man·aha ineba SP u·iataha.
Wa·al kamgipa nokara, a·dokni skanggipa Chief Minister Captain Williamson A Sangma sagini compound-on ong·achim indiba rasong gnange wa·alrang gipin nokrangonade gipangjaha.
Ia nokko wa·al kamengmiting somoio maming dal·a a·selrang ong·jana gita Tura songjinmani adita gittimrango bijolikoba adita kontarangna kimitna nangaha ine official-rang u·iataha.
Da·o dipet wa·al kamani a·selko tale ma·sikujaengoba ian bijoli kamsotani a·sel ong·na nanga ine official-rang chanchichipenga.