SHILLONG: Bangalore songjinmao Meghalaya a·dokni chatro chatrirangko aro gipin nanga kamna re·angenggipa manderangko sokachakna man·na gita Meghalaya Guest House dakna a·dok sorkari, gong kror 20 ong·gipa nokko brena tik ka·angaha.
Budbar salo Cabinet tom·ani ja·man kobor ra·timgipa manderang baksa agangrikengon, Bangalore songjinmao je building-kon sorkari brena tik ka·engachim, ian a·dokni manderangko sokachakna man·na gita me·asarangna ge 50 aro me·chikrangna ge 50 palangrang donggipa dormitory ge·gni donga ine a·dokni Cabinet Minister aro MDA sorkarini ku·wattimgipa Paul Lyngdoh parakataha.
“Bangalore songjinmaona Meghalaya a·dokni bang·a manderangan re·angronga aro ia biapo a·dokni chatro chatrirangba bang·en dingtang dingtang course-rangko poraiengani gimin chinga Meghalaya Guest House dakna ia nokko brena tik ka·aha,” ine Lyngdoh aganaha.
Bangalore-o Meghalaya House-ko rikna miksonganirang dongama dongja ine sing·anina aganchakaniko on·angskaengon, “Da·o dipetde chinga Bangalore-o poraienggipa chatro chatrirang bang·ani gimin uamangna dongchakaniko on·nasa chanchiengkua. Meghalaya House-ko rikna miksonganiba donga indiba Bangalore songjinmao poraienggipa chatro chatrirang dongchakanirangko man·na neng·engani gimin aro damrang rakani gimin chinga Meghalaya Guest House-kosa on·chengna miksongenga. Meghalaya House-ko rikanio kamrangko nakatatna nanggen, officer-rangko donna nanggen aro dingtang dingtang kamrang bang·en donga,” ine Cabinet Minister aganaha.
Da·o dipet Meghalaya House-ko rikna man·kujaengani gimin sorkari, Bangalore songjinmaona re·angenggipa a·dokni manderangko sokachakna aro uano poraienggipa chatro chatrirang dongchakna man·na gita ia nokko brena tik ka·aha ineba Lyngdoh parakataha.
