NEHU Tura Campus-o Prof Fameline Marak, gital PVC ong·e jako ra·a

TURA/SHILLONG: North Eastern Hill University (NEHU) Tura Campus-o saksa ja·delbatsranggipa professor, Prof Fameline K Marak, gital Pro Vice Chancellor (PVC) ong·e jako ra·aha.
Prof Marak, March-ni 26 tarik Budbar salo, NEHU Tura Campus-ni gital PVC ong·e jako ra·aha aro uni kamko jako ra·anio dingtangmancha tom·aniko ong·atangaha.
NEHU Tura Campus-ni gital PVC Prof Marak, 1996 bilsini June 1 tariko, Garo Department-ni Professor ong·e kamko ka·chengahachim aro uni kamo u·igipa ong·an baksana lekka porani a·bao an·tangko on·kanggipa ong·e, ua A·chikrangni daka rikani aro ku·agananiko namdapatanio, mongsonggipa daitoko ka·aha.
Prof Marak-ni Tura Campus-o gital PVC ong·e jako ra·ahani gimin NEHU-ni dilgiparang kusi ong·aniko parakatengon, uni dilanichi Tura campus-o dingtanganiko ra·bana man·gen ine an·tangtangni ka·dongchakenganikoba parakataha.
Indake ong·engon, NEHU Shillong Campus-ni gital PVC-na songako man·gipa Prof Sherwin M Sungoh, re·anggipa March-ni 21 tariko, kamtangko jako ra·angskaaha.
India sorkarini ning·o donggipa Education Ministry aro a·dok sorkarini ge·etaniko man·ani ja·man Prof Sungoh, Shillong Campus-ni gital PVC-na songaniko ra·chakaha.
NEHU-o ong·enggipa obostarangna aro chatro chatrirangni okumu chake jingjengatanirangna a·bachengode ua PVC-ni kamko ra·na jechakahachim.
NEHU-ni Vice Chancellor Prof PS Shukla, kamtangona re·bapilkujaengani gimin da·o ua University-ni saksa ja·delbatsranggipa PVC-ba ong·e Vice Chancellor-ni kamkoba jako ra·na nangao ga·akenga.