SHILLONG: Ia sal somoirango bang·a nokdangrangan nangana bate bijolini bill-rang sokenga ine matnangaranirangko nikna man·engani gimin iandake bill sokaniko namatna a·dok sorkari ku·rachakaniko on·angaha aro iandake bill-rang bate sokon seachi badi ka·china gita a·dokni manderangko didiangaha.
“Chinga iani bidingo bang·en talatanirangko on·manaha aro banoba iandake bill-rang sokgenchimode Revenue section-ni AWD-ona badi ka·aniko ra·bana nanga. Chinga manderangni neng·nikanirangko namatna jotton ka·gen,” ine a·dokni Power Minister AT Mondal ku·rachakaniko on·angaha.
Mitam nokdangrangde, gitcham bill-o chu·onga gita bill-rangko tarijani a·selba bill-rang bate sokenga ineba ua aganaha.
“Iandakgipa obostarangkoba nikna man·a, uni gimin bijoli jakkalenggipa pilak nokdangrangkon chingona u·iatchina chinga mol·molenga. Manderangni neng·nikanirangko chinga namatna jotton ka·gen,” ine Power Minister ku·rachakaniko on·angaha.
Meghalaya a·dokni bang·a biaprangon nangana bate bijolini bill-rang sokengani gimin manderangni matnanganirangna Power Minister, ia talataniko on·angaha.
Adita salrangna skang ong·atanggipa Assembly-ni Budget Session-oba iandake bijolini bill-rang bate sokengani gimin membor-rang, sorkariko sing·doangenba, manderangni neng·nikanirangko namatchina didiangtokahachim.
