SHILLONG: Shillong Medical College-ko chalaianio a·dok sorkari, a·doktangni manderangkon dangdike on·china nangnikenga ine Budbar salo, a·dokni Health Minister Ampareen Lyngdoh parakatenba, a·songni dingtang dingtang biaprango kam ka·enggipa medical professional-rang, jekai doctor-rang, specialist-rang aro uandakgipa manderangko, a·doktangona re·bapile kam ka·china didiataha.
Shillong Medical College Management Society-ni Governing Council tom·aniko dilangengon, Shillong Medical College-o a·doktangni manderangkon dangdike on·china nangnikaniko Health Minister parakangaha.
“Medical-ni kamrango chinga gipin biaprango kam ka·enggipa manderangko re·bae a·doktangna dangdike on·china nangnikenga. Uni gimin Meghalaya a·dokni depante aro demechikrangko a·dokona re·bapilchina aro ia mongsonggipa kamo bak ong·echina okamatenga,” ine Lyngdoh aganaha.
Skango Suraksha Centre dakgipa biapni case-ko sorkari cheaha ine janapatengon, “Rasong gnange sorkari ia case-ko cheahani gimin chinga kusi ong·a aro da·o administration block-ko rikna gita contractor-na pakwate on·manaha,” ine Lyngdoh aganaha.
Health Minister-ni aganani gitade, Medical college-o skigiparangko ra·ani kamrang matchotangengaha aro gital songako man·gipa professor-rang, kamtangtangko jako ra·etokengaha.
“Kam ka·giparangko donchakna 12 unit donggipa building-ko tarimanaha aro dingtang dingtang department-rangna biaprangkoba tarimanaha. Dingtang dingtang neng·nikanirangko namatna gita department-ni dilgiparangna aro gipinrangna salsani workshop-ko ong·atna tik ka·aha,” ine Lyngdoh aganaha.
Medical college-o namgipa skichakram biaprangko nangengani gimin janapatskaengon, “An·chingna namgipa lecture room-rangko, chu·onga gita ki·taprang donggipa library-ko aro college-ko name chalaina man·na gita pilak cholrangkon nangenga. Ia college-ko bakan National Medical Commission nina re·baengahani gimin pilak nanga dakchakanirangko on·engaha,” ine Health Minister parakataha.
Medical college-o napna dorgasto galani niamrang, fee-rang aro gipin nanganirangko April jani bon·angachibara u·iatnaba gnang ine janapatskaengon, NMC-ni nieanio chu·sokgipa ong·ahaode Shillong Medical College-ko chu·gimik chalaina man·gnok ine Health Minister parakataha.