Tura Medical College-ni session-ko mikkang bilsioni a·bachengna man·naba gnang: Mukul

TURA: Garo Hills-o rikenggipa Tura Government Medical College-ko Mongolbar salo, Opposition dolni dilgipa Mukul Sangma niangaha aro ia medical college-ni session-ko re·baenggipa bilsionide a·bachengna man·naba dongaha ine an·tangni ka·dongchakenganiko parakangaha.
Tura Govt Medical College-ni kamrangko nianganio Sangma baksana Trinamool Congress (TMC)-ni dingtang dingtang dilgiparangba dongpaaha.
Ia medical college-ko niangani ja·man kobor ra·timgipa manderang baksa agangrikengon, “Ia project-na India sorkari, tangka paisarangko chame on·aha aro anga an·tangan iana pangchakaniko songe on·aha. Ia biapko India sorkarini seokahani gimin anga kusi ong·a,” ine Sangma aganaha.
Ia project-ni ja·manchakahani gimin an·tangni suk ong·gijaniko parakatengon, ia project-ko ru·utatanichi korosrang batroroangjana uamang nangnikenga aro iani bidingo uamang Meghalaya sorkari baksa agangrikaha ine Opposition dolni dilgipa parakataha.
“Batanggimin chang Assembly-ni session-oba chinga iani gimin sorkario sing·doaha aro kamrangko ru·utatchajana gita sorkari ku·rachakaniko on·aha. Uni gimin Medical College-ko chinga ta·raken kulina nangnikenga,” ine Sangma aganaha.
Assembly-o u·iata gitan ia medical college-ko rikani kamrang matchotangengaha ineba a·dokni gitcham Chief Minister aganaha.
“Academic block-ko ia bilsini August 31 tarikni gisepo uamang matchotgen aro gipin kamrangkoba December 31 tarikni gisepon matchotgen ine chinga nikna man·aha. Ia medical college-ni teaching hospital (Tura Civil Hospital)-o palangrangko bariatna nangenga maina ian dongimin niam ong·a. Palangrangko ra·dapna gita a·bachengo gong kror 25 tangkarangko chamataha aro iakoba chinga nipilanggen. Ia project, manderangni nangnikani gita ong·china chinga kamrangko nirokenga,” ine Opposition dolni dilgipa Mukul Sangma aganaha.
Ia medical college-ara chadamberangko doctor-rang ong·atna cholrangko on·asan ong·aigija jolni manderangna nambata sanna bananirangko on·na dakchakani ong·gen ineba Sangma aganaha.
“Uni gimin ia project-ko man·a dipet ta·rake matchotatna an·ching pilak nanga kamrangko ka·na nangenga. Ia college-ni academic session-ko re·baenggipa bilsionin a·bachengatako chinga nangnikenga,” ine Sangma aganaha.
Ja·mano ua Tura Civil Hospital-koba niangjolaha.