SHILLONG: Bristibar salo, skanggipa changna North East Food Safety Conclave-ko Shillong-o ong·atangaha aro ia tom·bimonganiko ong·atanio salgro salaram a·dokrango donggipa dingtang dingtang biaprangoni cha·ani tarigiparang bak ra·angtokaha.
Ia program-ko ong·atanio Meghalaya a·dokni State Food Testing Laboratory (STFL)-o Organic Testing Unit-koba kulijolaha.
Ia program-ko ong·atanio a·dokni Health Minister Ampareen Lyngdoh, mongsonggipa sokgipa ong·e jinmana aganprakangengon, cha·anirangko naljoke on·na man·na gita rakgipa niamrangko ra·gatna nangengani gimin janapangaha. Cha·anirangko rongtal an·talani gri dake tarie palgiparangni bidingo, mongsongbate bazaar antirango be·en bitinrangko bangbango palengani gimin an·tangni suk ong·gijaniko parakatengon, mitam dokkanrangode niamrangko ja·riken cha·ani bosturangko palenga ine Lyngdoh aganaha.
Ia tom·anio ramram chanchirimanirangkosan dakaigija, ja·ku de·na man·gipa agan-ku·pattianirangkoba ra·bachina gita Health Minister didiangaha.
Da·o dipet Meghalaya a·doko bolchet food safety vehicle ba garirang donga aro ia garirangko, Shillong, Tura, Williamnagar, Jowai, Nongstoin, Nongpoh, Baghmara aro Resubelpara-o donenga.
Ia garirangko, cha·ani porikka ra·e nina, manderangna mikrakatani aro training-rangko on·na jakkalenga.
A·dokona do·o ra·baaniko nirokna Task Force-ko songgen: Hek
U·IATTIMGIPAONI
SHILLONG: Meghalaya a·dokona a·palrangoniko do·o ra·baaniko nirokna gita a·dok sorkari, dingtangmancha Task Force-ko songna tik ka·angaha.
Bristibar salo, Meghalaya Poultry Farmers & Welfare Association (MPFWA)-ni membor-rang, bird flu ba do·oni sabisi batrikrikenggipa biaprangoniko a·dokona do·o ra·baenga ine kenchakaniko parakahani gimin iako a·dokni Animal Husbandry & Veterinary Minister AL Hek parakataha.
Ia task force-o association-ni membor ong·enggipa manderangoni saksako donatna man·gen ineba Department, uamangna ku·pattianiko on·angaha.
Do·oni sabisi man·gipa biaprangoniko a·dokona do·o ra·baenga ine kenchakenggipana aganchakaniko on·angengon, da·o dipet a·songni darang biapon bird flu-ko man·a dongkuja aro association-ni janapenggipa obostara 2019-2020 bilsio Haryana a·doko ong·gipasa ong·a ine Minister talataniko on·angaha.
“Ian da·ororo ong·enggipa obosta ong·genchimode a·dok sorkariona aro department-onaba u·iatanirang sokbagenchim aro iandakgipa obostarangni bidingo chingni department jrip dongjawachim. Sabisi man·gipa biaprangoniko a·dokona do·o ra·baa ong·ode chinga nanga gita ja·kurangko de·aigen,” ine Hek parakataha.
Iana skang, MPFWA-ni membor William Diengdoh-ba kobor ra·timgipa manderang baksa agangrikengon, Haryana aro Punjab a·dokrangoniko do·o ra·baenggipa gari bolsako uamang nikaha ine parakataha.
Do·oni sabisi batrikrikenggipa biaprangoniko da·o dipet a·dokona do·o ra·baaniko champengatchina gitaba MPFWA dabiangaha.
Ri Bhoi a·jao B’desh-ni sak 12 manderangko rim·a
U·IATTIMGIPAONI
SHILLONG: Budbar salo, Bangladesh a·songoni niam gri re·napbagipa sak 12 manderangko, Ri Bhoi a·jani Byrnihat-oniko rim·na man·aha.
Police-rangni u·iatani gitade, India aro Bangladesh a·songni sima gita manderangko badingsrukanio jak donggipa Sukur Janab Shaikh, Bangladesh a·songni dolsa manderang baksa Mumbai-oni Guwahati-ona songrebaenga ine koborko man·soani ja·man Ri Bhoi a·jani police-rang, Kamakhya Junction aro Guwahati Junction-o Train Nombor 15945 (LTT-Dibrugarh)-oniko am·sandina a·bachengaha.
Police-rangni sandirokanio Sukur Janab Shaikh-kode nikna man·jaha indiba sakkirangko man·enba, Bangladesh a·songni bi·sa sakgniko man·chape gimik sak 11 manderangko, Byrnihat OP-o dongipa mobile check post-o rim·na man·aha.
Ia manderang, AS-01EC 3528 Tata Sumo gario songrebaengachim ineba police-rang u·iataha.
Rim·ako man·gipa manderangara, Kakali Sardar (36), Hirina Dili Mulla (30), Unjilla Sadar (32), Rabia Begum (37), Panna Kamal Hussain (42), Poppy Hasu Mollah (26), Sonia Shaikh (24), Sobha Islam (28), Saja Uddin Sk (26) ong·a ineba police-rang aganaha.
Ri Bhoi a·jani SP Vivekananda Rathore-ni u·iatani gitade, Assam Police-ni dakchakanichi am·sandianirangko dakangkuon, Bangladesh a·songni Narail a·jao donggipa Koralia songni Sukur Janab Shaikh ba Sukur minggipa mandekoba apsan salon, Nalbari a·jaoniko rim·na man·aha.
Ia manderang, India a·songo niam gri songdongengachim aro uamangoniko tol·e tarigipa Aadhar Card, PAN card aro gipin lekkarangkoba man·aha ine police-rang u·iataha.
Ia manderang, Dawki-chipakna re·angengachim aro Bristibar pringwalni sima gita Bangladesh a·songona re·angna miksongengachim ine SP parakataha.
