SHILLONG: Umiam Dam gita gari gorarang re·rurajringengani gimin ia dam-na manderang kenchaktokengon, ia dam-ko naljoke rakkina uni department, nirokjringenga aro pilak nanga ja·kurangko de·enga ine Bristibar salo, a·dokni Power Minister AT Mondal, ku·rachakaniko on·angaha.
Mondal-ni kobor ra·timgipa manderangna parakatani gitade, Power department aro Meghalaya Energy Corporation Limited (MeECL), Umiam Dam-ko name rakkina kamrangko ka·enga.
Umiam Dam-ko taripiltaiani kamrang matchotani ja·man ia dam-na kenchakanirang adita komiangaha ine janapatengon, “Ia dam-ko naljoke rakkina miksonganiosa chinga ia dam gita dal·dalgipa garirangni re·ruraaniko champengaha. Chinga ia dam-ko nirokjringenga aro ia biapo chingni manderang aro police-rangba donge dam-ko naljoke rakkina kam ka·enga,” ine Power Minister parakataha.
Ia Umiam Dam-na dongimin bilsinasa jajrengna nangani ong·enga ine janapatskaengon, “Sing·anide ia dam-na dongimin bilsi bon·ani ja·man mikkangchi mai ong·gen? Ian namen ra·biani kam ong·enga maina ia Umiam Dam-onikon Umiam-ni 216 Megawatt (MW) ong·gipa unit dambrina aro Byrnihat sambao donggipa Umtru power project-naba chirangko on·enga. Ia Umiam Dam-onin ia pilaknan chirangko watatenga. Iani bidingo chinga chanchirimenga indiba da·o dipet maming ja·kurangko de·na gita tik ka·a dongkuja. Iani gimin chinga chanchirime tik ka·gen ine anga ka·dongenga indiba technology-rang ta·raken dingtangroroenga aro ia dam-na dongimin bilsiko ra·dodapna technology-rangba dongnaba donga. Indiba chinga iani bidingo jajrengchakenga,” ine Mondal aganaha.
Da·o dipet ia Umiam Dam gitan gari gorarang re·ruraengani gimin dingtang ramako tarina gita Detailed Project Report (DPR)-ko tarina National Highways & Infrastructure Development Corporation Limited (NHIDCL)-na on·manaha ineba Power Minister parakataha.
“Angni chanchia gitade kamrang a·bachengengaha aro chinga dingtang ramako tarigen. Ia dolongko 1965 bilsiosa tariahani gimin dingtang ramako tarina nangchongmotenga. Ua somoio garirangni jreanirangba komiachim indiba ia somoirango bang·a garirangan nangana bate mande aro bosturangko salenga. Uni gimin indita jregipa garirang re·rurana man·na gita dingtang dolongko nangchongmotenga,” ine Power Minister aganaha.
Bijoliko nambate on·na RDSS-ni ning·o ra·gatgipa cholrangko Cabinet ra·chaka
U·IATTIMGIPAONI
SHILLONG: Meghalaya a·doko bijoliko nambate on·na aro tangka paisarangko name jakkalna man·na gita a·dokni Cabinet, Revamped Distribution Sector Scheme (RDSS)-ni ning·o ra·gatgipa dingtang dingtang cholrangko ra·chakangaha.
RDSS-ni ning·o ra·gatgipa cholrangko ra·chakanio, Smart meter aro a·dokni dingtang dingtang biaprango mongsonggipa substation-rangko ra·dona Cabinet, Advanced Metering Infrastructure Service Provider-rangko songnaba ra·chakangaha.
Iani bidingo kobor ra·timgiparangna talataniko on·angengon, a·doko bijoli noksan ong·aniko komiatna aro bill tarianiko namdapatna ra·gatgipa smart meter-ni kamrango adita neng·nikanirangko chagrongna nangahani a·sel ja·manchakna nangaha ine a·dokni Power Minister AT Mondal parakataha.
Power Minister-ni talatani gitade, dakkigiparangoni joint venture partner dolsako blacklist ka·aha ine nikani ja·man a·bachengo dakkianiko den·galpilaha.
Ja·mano ia contract-ko qualify ong·gipa bidder ba dakkigipana on·aha aro iako Cabinet ra·chakangaha.
A·doko bijoliko nanganirang batroroengani gimin Shillong-ni NEHU aro Mawlai sub-station-rangko taridapna aro Mawlai Nongkwar-o gital sub-station-ko riknaba sorkari tangka paisarangko chame on·aha.
Tura-oba bijoliko nangani 20 MW-ona tang·doangahani gimin Danakgre-o donggipa BSF camp sambani Sericulture Office-o aro Dakopgre-o donggipa MTC-ni a·ao gital sub-station-ko rikna sorkari a·arangko ra·aha.
Nangchongmotgipa kamrango bijoliko dontonga gri on·na man·na gita Cabinet, Shillong Civil Hospital aro Tura Civil Hospital-o power back-up-na mongsonggipa project-koba ra·chakangaha. Tura-o hospital aro wilwilao donggipa biaprangna bijoliko on·na man·na gita 33/11 KV, 2X5 MVA sub-station-koba rikgen.