SHILLONG: Re·baenggipa jagnini gisepon a·doko palenggipa churango a·dok sorkari, QR Code-rangko jakkalna tik ka·angaha.
Iani bidingo dingtangmancha tom·aniko Sukrobar salo ong·atangaha aro ia tom·a matchotani ja·man a·dokni Commissioner & Secretary Matsiewdor War Nongbri, kobor ra·timgiparangna talataniko on·angengon, churango QR Code-ko ra·gatanichi, Indian Made Foreign Liquor (IMFL) ba India a·songo tarigipa foreign churangko tariaoni, churangko manderangni breaona kingking name nirokna man·gnok ine parakataha.
“Uni gimin da·ode chinga mai dakgipa bosturangchi chuko tarienga, maidake palenga, maidake ra·baenga aro maikai manderang breenga, ua pilakkon A-oni Z-ona nina man·gnok,” ine Nongbri aganaha.
Ia ja·kuko de·chakatahani gimin da·ode chu carton ge·antion QR Code-rang donggnok ineba ua parakataha.
Nongbri-ni talatani gitade, iani bidingo district officer-rangna ning·tue training-rangko on·gen aro office ge·anti, bottling plant ge·anti, bonded warehouse-rang aro chu dokkan ge·antion ia track entry system-ko on·gnok.
“QR Code ge·antion scan ka·e chinga ia bosturang banona sokangaha aro sana ra·angaha aro iarangko palama palkuja, uarangko ma·sina man·gnok,” ineba ua aganaha.
Ia QR code-ko ra·gatanichi department-ni gita revenue-rangkoba check ka·na man·gnok ine ua aganaha.
Ia kamko New Delhi-oni CMP Info System LLP jako ra·gen aro uamangni office-ko bakan Shillong-oba kuligen.