SHILLONG: Assam aro Meghalaya a·dokni simarango meligrikna man·jaenggipa bangki damdok biaprangko dolgnian ta·raken namatna nangnikenga ine Sukrobar salo, Assam a·dokni Chief Minister Himanta Biswa Sarma a·kangataha.
A·dok damgnini simarango meligrikna man·jaenggipa bangki damdok biaprangko a·dok damgnini dilgiparangan ta·rake namatna nangnikenga ine janapatengon, bangki dongenggipa damdok biaprangoni damgittamkode altuaen namatna man·aigen ine Assam Chief Minister aganaha.
Sukrobar salo, Ri Bhoi a·jani North East Police Academy-o ong·atanggipa Passing out parade-o dongpae bak ra·angani ja·man kobor ra·timgipa manderang baksa agangrikengon, a·dok damgnini simarango meligrikna man·jaenggipa biaprangko Assam-chipakniba ta·raken namatna nangnikenga aro ia damdok biaprangoni damgittamkode je somoioba namatna man·aigen ine Sarma parakataha.
“Simarango ong·enggipa obostarangko chingaba ta·raken namatna nangnikengani gimin je bangki dongkuenggipa damdok biaprangoba meligrikaniko ra·bana nangnikenga aro ia biaprangoni damgittamkode chinga je somoioba namatna man·aigen. Angni chanchiani gitade, gipin damgittam biaprangkoba Meghalaya-chipakni apsan namatna nangnikengakon. Iani bidingo chinga kamrangko ka·engaha aro ka·angkuaigen. Ia meligrikgijaniko a·dok damgnionin apsan melie namatna man·gen ine anga ka·dongenga,” ine Assam Chief Minister aganaha.
Ia kamara a·dok damgnini manderangon nangchakeaniko ra·bana man·ani gimin simsakesa ja·kurangko de·na nanggen ineba ua aganaha.
“Da·o dipet somoirang nambrekujaenga indiba ia meligrikgijaniko ta·raken namatna an·ching pilakan ka·dongna aro bi·na,” ine Sarma aganaha.
Simarangko survey ka·ani bidingo sing·anina aganchakaniko on·angengon, “A·dok damgnini simarangko Survey of India salengaha aro kamrangkoba bewalan matchotangengaha. Jekon chinga Home Minister-ni mikkango soi ka·grikahachim, uan a·dok damgnini sorkarirangna nangnikani gitan ong·aha,” ine Sarma aganaha.
Assam aro Meghalaya a·dok damgnini simarango ru·utbea bilsirangonin dam 12 biaprango meligrikgijanirangko nikna man·engachim indiba ia dam 12 biaprangoni damdok biaprangkode a·dok damgnini gisepo songgigrike, biaprangko sualgrikahachim. Da·o bangki dongkuenggipa damdok biaprangoba a·dok damgnini gisepo meligrikaniko ra·bana gita a·dok damgnini sorkarirang agangrikaniko a·bachengatahachim indiba ia agangrikanirang da·onan matchotchipskakujaengachim.
Ia a·dok damgnini simarango meligrikna man·jaenggipa biaprangko namatna ja·ku de·enggipa gnigipa bako man·chapenggipa biaprangara Langpih baksana Ri Bhoi a·jani Borduar, Nongwah-Mawtamur, Deshdoomreah, Block-II aro West Jaintia Hills-ni Block- I, Psiar – Khanduli jolrang ong·engachim.
A·dok damgnini gisepo meligrikna man·jaenggipa dam 12 biaprangoni skanggipa bako namatna soi ka·grikgipa biap damdokara, Gizang, Tarabari, Boklapara, Khanapara-Pilingkata, Ratacherra, aro Hahim ong·skaachim.
Ia meligrikna man·jaenggipa damdok biaprangoni sq km 18.51-ko Assam aro sq km 36.79-ko Meghalaya ra·na gita songgigrikahachim.