SHILLONG: Tura-ni Babupara jolo donggipa Garo Labour Corps-ni gitcham Cenotaph-ko pe·gale gital Cenotaph-ko rikna miksonganiko dingtang dingtang dolrangni jegaltokani ja·man, ia dolrangni dabienga gita ia cenotaph-ko rikna committee-ko songpiltaina a·dokni Chief Minister Conrad K Sangma ku·rachakaniko on·angahaoba, ian sorkarini a·a ong·jani gimin ia cenotaph-ko rikanio sorkari bilko man·na kraja ine Tura-ni MDC aro BJP-ni state vice president Bernard N Marak a·kangattaiaha.
Marak-ni parakatani gitade, ia biapko District Administration aro Tura Municipality-ni kangdraaniara Sixth Schedule-ko pe·ani ong·enga aro Tribal-rangni a·ako ra·sekanisa ong·enga.
Ia Cenotaph-ko pe·ani gimin Garo Hills-o donggipa dingtang dingtang dolrang aro songdongenggipa manderangba sorkari aro Tura Municipal Board (TMB)-ko jegaltokengachim ine nikna man·a.
“Cenotaph rikani kamrangko da·o uamang dontongataha aro committee-ko songenga indiba ia committee-o sako uamang bak ong·atenga chinga ma·sija. Chingni jegalanide a·a ra·sekani giminsa ong·enga maina ia a·ara uamangni a·a ong·ja. Iako chinga raken jegalaikugen,” ine Tura MDC parakataha.
Cenotaph-ko gital dake rikpiltaina committee-ko songna tik ka·ani gimin janapatengon, “Mai committee-ko ba ja·kuko de·na uamang miksongenga uade maming ong·ja indiba a·ani giminsa chinga jegalenga. Ia a·ade sorkarini a·a ong·ja aro ia a·ako uamang kangdrana man·jawa,” ine Marak aganaha.
Iani bidingo dingtang dingtang department-rangna notice-ko on·na gita Garo Hills Autonomous District Council (GHADC) kamrangko ka·engkua ineba ua aganaha.
Ia a·arangara District Council-ni ning·o donggipa Nokmani a·arangsa ong·a ine janapatskaengon, Nokma-ni aro District Council-ni No Objection Certificate (NOC) gri maikai TMB ba a·dok sorkari, ia biapo gital building-ko rikna tik ka·na man·a ine Marak sing·doataha.
Sorkarini dingtang dingtang department-rangna uamang ADC-rangchi u·iatanirangko on·anggen ine janapatengon, “Ia u·iatanirangna uamang aganchakanirangko on·jagenchimode chinga aino pangchak ja·kurangko de·anggen. Uamang (sorkari) Tribal a·arangni nokgiparang ong·ja,” ine Marak parakataha.