SHILLONG: Meghalaya a·doko chu dokkanrangko aro bonded warehouse-rangko kulina gita a·dok sorkari, gital niamko ra·gatna siengani gimin gital chu dokkan aro bonded warehouse-rangna licence on·aniko dontongatchengna tik ka·angaha.
Iani bidingo kobor ra·timgiparangna talataniko on·angengon, chu dokkan aro bonded warehouse-rangko kulina sorkari, gital niamko ra·gatna sienga aro name am·sandianirang matchotani ja·mansa chu dokkan aro bonded warehouse-rangko kulina gita sorkari licence-rangko on·gnok ine Mongolbar salo, a·dokni Excise Minister Kyrmen Shylla parakataha.
“Chu dokkanrangna licence on·aniko chinga dikdiksana dontongatchengaha aro da·o gital niamrangko chinga ra·gatgen. Chu·gimik am·sandianirangko matchotani ja·mansa chinga licence-rangko on·piltaignok,” ine Shylla aganaha.
Officer-rang kamrangko a·bachengengaha ine janapatengon, “Badia biaprango chu dokkanrangko bariatna nangenga aro badia biaprango chu dokkanrangna licence on·aniko dontongna nangenga, uarangko da·o sorkari nichengenga,” ine Excise Minister parakataha.
Shylla-ni aganani gitade, badiaba badiaba biaprango chu dokkanrang bang·dugaahani a·sel churangko palnangjaenga ine chu dokkan nokgiparangni badi ka·anirangko man·soahani gimin sorkari, ia ja·kuko de·chakataha.
“Chu dokkan nokgiparangni iandake badi ka·anirango pangchake chinga gital licence on·aniko dontongatchengaha. Chinga name sandichengani ja·mansa gital licence-rangko on·piltaignok. Badiaba biaprango chu dokkanrang komie churangko palnangenga ine nika ong·ode chinga ua biaprango chu dokkanrangko kulina licence-rangko on·gen indiba uamango nangchongmota lekkarang dongchengna nanggen,” ine Shylla aganaha.
Skul aro olakkiram nok sambarango donggipa chu dokkanrangni gimin sing·anina aganchakaniko on·angengon, ia pilakkon sorkari name nipiltaigen indiba da·o dipet gital licence-rangko on·a dongkuja ine Shylla parakataha.
Nokmarangni No-Objection Certificate (NOC)-rangko on·anio pangchakesa sorkari, licence-rangko on·enga ineba Excise Minister talataniko on·angaha.
“Manderangni nangnikanirangko chinga mande ra·a aro Nokmarangan songni ba gittimni bidingo ma·sigipa ong·e NOC-rangko on·enga. Uni giminsa chu dokkanrangko kulina songni dilgipa ba Nokmarangni NOC-ko nangchongmota,” ine ua aganaha.
